Хонконгийн хууль тогтоох байгууллага Хятадын үндэсний аюулгүй байдлын ашиг сонирхлыг зөрчсөн кинонуудыг хориглох тухай шинэ хуулийг баталжээ.

Тус хуулийг зөрчсөн тохиолдолд гурван жил хүртэлх хорих ял оноож, 130 мянган ам.долларын торгууль ногдуулах аж. Гэвч энэхүү хууль тогтоомж нь орон нутгийн кино үйлдвэрлэлийг боомилох болно гэж шүүмжлэгчид үзэж байна.

БНХАУ өнгөрсөн жил Хонконгт Үндэсний аюулгүй байдлын тухай хуулийг баталж, аливаа тэрслүү үзэл бодлыг хориглосон билээ. 2019 онд өрнөсөн ардчиллын төлөөх томоохон жагсаалуудын дараа батлагдсан уг хуулийн дагуу салан тусгаарлах, түлхэн унагаах, терроризм болон гадаадын хүчинтэй хуйвалдсан үйлдлийг гэмт хэрэгт тооцох юм.

Харин энэ удаагийн киноны цензурийн тухай хуулийг сөрөг хүчингүй Хууль тогтоох зөвлөлөөр баталжээ. Үүний үр дүнд, Хонконгийн захиргааны хоёр дахь хамгийн хүчирхэг хүн болох Ерөнхий нарийн бичгийн дарга "Үндэсний аюулгүй байдалд заналхийлж болзошгүй үйл ажиллагааг дэмжиж, алдаршуулан, урамшуулж, өөгшүүлсэн" киноны тусгай зөвшөөрлийг цуцлах эрхтэй болсон байна.

Энэхүү шинэ хууль Хонконгийн кино урлагийн салбарын бүтээлч байдал, үзэл бодлоо илэрхийлэх эрх чөлөөнд халдаж байгааг мэргэжилтнүүд болон контент үйлдвэрлэгчид онцолж байгаа юм.

Гэвч эрх баригчид тус хууль гарахаас өмнө урлагийн салбарыг аль хэдийн онилоод байсан билээ. 2019 оны эсэргүүцлийн хөдөлгөөний тухай өгүүлсэн "Улаан тоосгон ханан дотор" хэмээх баримтат кино Хонконгт энэ оны 6 дугаар сард нээлтээ хийсэн хэдий ч тус бүтээлийг орон нутгийн кино театруудаас гэнэт татан авсан бөгөөд дистрибьютер компани нь Засгийн газрын санхүүжилтээ алдсан байна.

Эх сурвалж: BBC

---