Судан улсад төрийн эргэлт гарсны дараа Дэлхийн банкны зүгээс тус улсад үзүүлэх тусламж, мөнгөн гүйлгээгээ царцаасан тухай мэдээлжээ. Энэ долоо хоногийн даваа гарагт тус улсын удирдагчид цэргийн эрх мэдэлтнүүдэд баригдсаны дараа улс даяар эсэргүүцлийн жагсаал болж, уг үйл явдал олон улсын шүүмжлэлийг дагуулаад байгаа.

Африкийн холбоо Судан улсын гишүүнчлэлийг түдгэлзүүлсэн бол АНУ тусламжаар олгох 700 сая ам.долларыг мөн болиулаад байна. Сүүлийн хоёр жилийн хугацаанд Суданы иргэдийн төлөөлөл болоод цэргийн удирдагчид эрх мэдлээ хувааж төрийн эрхийг удирдаж байсан ч армийн удирдагчид төрийн эргэлт хийж дангаараа ноёлохыг санаархсан.

Улс орнууд, олон улсын байгууллагууд зээл тусламжаа царцааж байгаа нь ердөө эхлэл бөгөөд төрийн эргэлтийг удирдсан генерал Абдель Фаттах Бурханд Дэлхийн банк, Африкийн холбоо дарамт шахалт үзүүлсээр байна. Генерал Бурхан төрийн эргэлт иргэний дайнаас аврах үйлдэл байсан хэмээн байр сууриа хамгаалжээ.

Дэлхийн банк Суданы газар тариалан, тээвэр зуучлал, эрүүл мэнд, боловсролын салбарыг дэмжиж гурван тэрбум ам.долларын хөрөнгө оруулаад байгаа. Тус банкны дэмжлэгээр Судан улс ардчилалд шилжиж, эдийн засгаа сэргээх боломжтой байсан юм.

Судан улсыг төлөөлөн АНУ, Европын Холбоо, Хятад зэрэг улс орнуудад сууж байсан зургаан элчин сайдыг чөлөөлсөн байна. Гурав дахь хоногтоо үргэлжилж буй иргэдийн жагсаалын үеэр 10 хүн цэргүүдэд алагджээ.

Эх сурвалж: ВВС

---