Иран улсын шатахуун түгээх сүлжээ өнгөрөгч мягмар гарагт цахим халдлагад өртөж, шатахуун түгээх станцуудад урт дараалал үүсжээ.

Тус улсын жолооч нар төрөөс олгосон ухаалаг картаар хөнгөлөлттэй түлш худалдан авдаг бөгөөд хакерууд энэхүү үйлчилгээг үзүүлдэг дотоод сүлжээг онилсон байна. Түүнчлэн, халдагчид нийслэл Тегеран болон бусад хотын хурдны зам дээрх дижитал сурталчилгааны самбарт нэвтрэн, "Дээд удирдагч Аятолла Али Хаменеи, бидний түлш хаана байна?" гэсэн бичгийг гаргажээ.

بنابر گزارش‌ها از ایران، امروز ۴ آبان همزمان با قطع شدن سامانه کارت سوخت، تعدادی از تابلوهای شهری هم در اصفهان "به دلیل هک و حمله سایبری" پیام‌هایی اعتراضی درباره بنزین و علیه جمهوری اسلامی نمایش داده‌اند. pic.twitter.com/DslODBf5in

— BBC NEWS فارسی (@bbcpersian) October 26, 2021

Лхагва гарагийн өглөө гэхэд тус улсын 4,300 шатахуун түгээх станцын ердөө таван хувь нь л эргээд сүлжээнд холбогдоод байсныг Ираны газрын тосны бүтээгдэхүүн түгээх үндэсний компанийн төлөөлөгч мэдэгдсэн юм. Гэхдээ, бараг 3,000 станц түлшээ хөнгөлөлтгүй үнээр борлуулах боломжтой болсон аж.

АНУ-ын олон жилийн хориг арга хэмжээ, Засгийн газрын буруу менежмент болон авлигын улмаас эдийн засаг нь маш их хохирол амссан Ираны ихэнх иргэн хөнгөлөлттэй шатахуунаас хамааралтай байдаг юм. Ираны Засгийн газар 2019 онд шатахууны үнийг 50 хувиар нэмсний дараа тус улс даяар олон нийтийн эсэргүүцлийн хөдөлгөөн өрнөсөн бөгөөд энэ удаагийн халдлага уг үйл явдлын хоёр жилийн ойтой давхацсан байна.

Өөрсдийгөө "Махчин бор шувуу" гэж нэрлэсэн нэгэн бүлэглэл цахим халдлагын хариуцлагыг хүлээгээд байгаа хэдий ч Ираны интернетийн бодлого боловсруулах дээд байгууллагаас кибер халдлагыг гадаадын улс үйлдсэн гэж мэдэгджээ.

Ерөнхийлөгч Эбрахим Раиси энэ талаар "Гадаадын төрийн хүчин манай улсад эмх замбараагүй байдал үүсгэж, иргэдийн амьдралыг үймүүлэх замаар олон нийтийн уур хилэнг бадраахыг зорьж байна" хэмээн тэмдэглэсэн байна.

Эх сурвалж: BBC

---