Австрали улсын иргэдийг хилийн чанадад зөвшөөрөлгүй зорчихыг хориглосон хоригийг ирэх долоо хоногт цуцлахаар болжээ. Ингэснээр, дэлхийн хамгийн хатуу хилийн дүрэм журмуудын нэгийг сүүлийн 19 сарын турш дагаж мөрдсөн австраличууд гадаад руу аялах боломжтой болох юм.

Эрх баригчдын мэдээлснээр, ирэх 11 дүгээр сарын 1-нээс эхлэн иргэд хилээр гарахдаа зөвшөөрөл авах шаардлагагүй болох гэнэ. Гэхдээ үүнд зөвхөн вакцинд бүрэн хамрагдсан Австралийн иргэд хамрагдах боломжтой бөгөөд гадаадын иргэдэд хамаарах зарим дүрмийг удахгүй зөөлрүүлнэ гэж тус улсын Засгийн газраас тэмдэглэсэн байна.

Австралийн Дотоод хэргийн сайд Карен Эндрюс энэ талаар "Он дуусахаас өмнө вакцинжуулалтад бүрэн хамрагдсан тусгай ур чадварын ажилтнууд болон олон улсын оюутнуудыг хүлээн авахаар ажиллаж байна" хэмээн мэдэгджээ.

Харин Ерөнхий сайд Скотт Моррисон Австрали улс хилээ эргэн нээж магадгүйг онцлон, "Австраличуудад энгийн амьдралыг нь буцааж өгөх цаг болсон" гэж хэлсэн байна.

Одоогийн байдлаар тус улсын иргэд зөвхөн зайлшгүй ажил эсвэл нас барж буй хамаатан садан дээрээ очих зэрэг онцгой шалтгаанаар Австралиас гарч болж байгаа билээ. Тэгвэл цар тахлын эсрэг вакцинжуулалтын түвшин нэмэгдэхийн хэрээр Австралийн зарим мужид чанга хатуу хязгаарлалтыг цуцлан, хилээ нээж эхлээд байгаа юм.

Эх сурвалж: BBC

---