Талибанчууд өнгөрсөн 8 дугаар сард Афганистаны засгийн эрхийг гартаа авснаас хойш тус улсад урьд өмнө нь байгаагүй хэмжээний хүмүүнлэгийн хямрал нүүрлээд байгааг НҮБ-аас анхааруулжээ.

Олон улсын зүгээс яаралтай арга хэмжээ авахгүй бол ирэх өвөл олон сая афган иргэн өлсгөлөнд нэрвэгдэн, амиа алдана гэж НҮБ-ын Дэлхийн хүнсний хөтөлбөрөөс мэдэгдсэн байна. Талибаны дэглэмийн хариуд ямар арга хэмжээ авах талаар дэлхий нийтээр хэлэлцэж байгаа энэ үед Афганистаны хэврэг эдийн засгийг тэтгэж байсан олон улсын сан, хүмүүнлэгийн тусламжууд зогсоод байгаа билээ.

Барууны гүрнүүд тусламжаа зогсоож, Дэлхийн банк, Олон улсын валютын сан ч мөн төлбөрөө гацаагаад байгаа тул гадаадын тусламжаас ихээхэн хамааралтай байсан тус улсын нөхцөл байдал огцом уналтад ороод байна. Мэргэжилтнүүдийн тооцоолж буйгаар, тус улсын нийт хүн амын талаас илүү хувь буюу 22.8 сая орчим хүн хоол тэжээлийн хурц дутагдалд орох магадлалтай байгаа бөгөөд тэдний дунд таваас доош насны 3.2 сая хүүхэд байгаа юм.

НҮБ-ын Дэлхийн хүнсний хөтөлбөрөөс өнгөрөгч 9 дүгээр сард Афганистаны гэр бүлүүдийн ердөө тавхан хувь нь өдөр бүр хангалттай хооллодог гэж мэдээлж байсан билээ. Тэгвэл одоогийн байдлаар нэг сая хүүхэд хоол тэжээлийн хүнд хэлбэрийн цочмог дутагдлаас болж амь насаа алдах эрсдэлтэй байгаа аж.

Өлсгөлөнд нэрвэгдсэн олон афган иргэн эд хөрөнгөө зарж, хоол хүнс худалдаж авах болсон бөгөөд бүр цаашлан үр хүүхдээ зарах тохиолдол ч гарах болжээ. "BBC" агентлагийн сурвалжлах баг ийм нэгэн гэр бүлтэй ярилцахад, тэд бусад хүүхдээ тэжээхийн тулд бяцхан охиноо 500 ам.доллароор зарсан гэж хэлсэн байна.

Охиныг худалдаж авсан эрэгтэй нь түүнийг алхаж эхэлмэгц авч явна гэж хэлсэн бөгөөд гэр бүлд нь төлбөрийнхөө талаас илүү хувийг нь өгөөд байгаа аж. Энэ мөнгөөр тус гэр бүл хэдэн сарыг даван туулах боломжтой гэнэ. Бяцхан охиныг худалдаж авсан эрэгтэй нь түүнийг өөрийн хүүхэдтэйгээ гэрлүүлнэ гэж хэлсэн боловч яг юу болохыг хэн ч хэлж мэдэхгүй юм.

Охины ээж "Бусад хүүхдүүд маань өлсөж үхэхдээ тулаад байсан тул бид охиноо зарахаас өөр аргагүй болсон. Би яаж гуниглахгүй байх юм бэ? Тэр бол миний хүүхэд шүү дээ. Би охиноо зарахад хүрээгүй байсан ч болоосой гэж хүсэж байна" хэмээн ярьжээ.

Эх сурвалж: BBC

---