Канадын Бритиш Колумб мужийн эргийн ойролцоо байсан "Зим Кингстон" ачааны хөлөг онгоц дээр гал гарч, 16 хүнийг яаралтай нүүлгэн шилжүүлсэн талаар орон нутгийн эрх баригчид мэдээлжээ.

Тус хөлөг онгоц дээрх арван чингэлэг шатсан хэдий ч багийн гишүүд гэмтэж бэртээгүй гэж Канадын эргийн хамгаалалтын албанаас тэмдэглэсэн байна. Нүүлгэн шилжүүлсэн хүмүүсийг Огден Пойнт дээр цагдаа, эрүүл мэндийн мэргэжилтнүүд болон цагаачлалын албан тушаалтнууд угтан авчээ.

АНУ-ын Эргийн хамгаалалтын албаны мэдэгдсэнээр, энэхүү нөхцөл байдал өнгөрсөн долоо хоногийн баасан гарагт эхэлсэн аж. Тухайн өдөр "Зим Кингстон" ачаа тээвэрлэлтийн хөлөг онгоц огцом хазайсны улмаас 40 чингэлгээ алдсан гэж мэдүүлжээ. Харин бямба гарагийн өглөө онгоц дээрх чингэлэг дотор гал гарч байгааг Канадын албаныхан анзаарсан байна.

Ингээд албаныхан галыг тогтворжуулахаар шөнөжин ажилласан бөгөөд усан онгоцонд байгаа химийн бодисуудын улмаас галыг шууд усаар унтраахаас сэргийлж, онгоцны их бие рүү хүйтэн усаар шүршсэн аж.

Одоогийн байдлаар галын дийлэнх хэсэг нь унтарсан хэдий ч багийн таван гишүүн үлдсэн галыг унтраахаар ажиллаж байгаа бөгөөд хоёр хөлөг онгоц нөхцөл байдлыг ажиглаж байгаа юм.

All fires produce toxic substances. Incident Command has detailed information on the chemicals that were on fire and are now smoldering in the containers onboard the #ZimKingston. pic.twitter.com/jtjhlJ1zAa

— Canadian Coast Guard (@CoastGuardCAN) October 24, 2021

 Эх сурвалж: UPI

---