Дэлхийн 76 оронд зээлийн хүүгийн дээд хязгаарыг төрөөс тогтоосон байдаг. Тэгвэл манай улсад зээлийн хүүгийн дээд хязгаарыг тогтоох боломжтой талаар Бизнесийн дунд сургуулийн захирал, эдийн засагч Н.Дашзэвэг дурдлаа. 

Тэрбээр "Мөнгө хүүлэлттэй тэмцэх, зээлийн хүүгийн дээд хязгаарыг тогтоох хуулийн төслийг боловсруулан УИХ-д оруулж байсан. Гэвч тухайн үед сонгууль дөхөөд энэ хуулийг хэрэгжүүлэх сонирхол Монголбанк, арилжааны банкуудад байгаагүй. Мөнгө хүүлэлттэй тэмцэх хууль зайлшгүй гарах хэрэгтэй. Арилжааны банк, ББСБ, ломбардын хүүг цэгцлэх хэрэгтэй байна. Эднүүс дэндүү өндөр хувийн хүүтэй хэвээрээ байна.

Банкууд хадгаламжийн хүүг өсгөөд байгаа учраас зээлийн хүүг өсгөх боломжгүй. Банкууд хүний хадгаламжийг хүүлж, зээл болгож, дундаас нь ашиг олж ажиллаж байгаа учраас хадгаламжийн хүү буурах ямар ч буурах боломжгүй нөхцөл байдал үүсээд байгаа. Төрөөс хадгаламжийн хүүний дээд хязгаарыг тогтоож өгөх ёстой. Зээлийн хүүгийн дээд хязгаарыг тогтоож, өгснөөр банкуудын дунд өрсөлдөөн гарч хэрэглэгчдийг татах боломжтой. Бусад орны дунджаар зээлийн хүүгийн дээд хзгаар 4-6 хувьтай байдаг. Манайд ч 4-6 хувь байх боломжтой" гэлээ. 

---