Италийн ИТА Эйрвейс шинээр байгуулагдсан үндэсний нислэгийн компани өнгөрсөн долоо хоногт үйл ажиллагаагаа эхлүүлжээ. Гэвч тийм ч амжилттай эхлээгүй бололтой.

Тус улсын Алиталиа нислэгийн компанийг Засгийн газар эзэмшилдээ авч ИТА Эйрвейс компанийг байгуулсан бөгөөд хуучин компанид ажилладаг байсан онгоцны үйлчлэгчид ажлаа алдсан болоод цалин урамшууллыг нь хассан явдлыг эсэргүүцэж гадаа гудамжинд хувцсаа тайлж, эсэргүүцэл илэрхийлэн жагссан байна.

Ром хотын төвийн Кампидоглиод Алиталиад ажилладаг байсан 50 эмэгтэй онгоцны үйлчлэгч дүрэмт хувцсаа тайлан дотуур хувцастай жагсчээ. Тэд “бид бол Алиталиа” хэмээн уриалан дуудсан байна.

Үйлчлэгч эмэгтэйчүүд ажлаа алдсанаас гадна ИТА Эйрвейс 100 хувь төрийн өмчит компанид үлдэж гэрээ байгуулсан ажилчдын цалинг хассан явдлыг эсэргүүцжээ. Үйлдвэрчний эвлэлээс Алиталиагаас ИТА Эйрвейсд үлдсэн хүмүүст илүү бага цалин олгож байгааг буруутгажээ.

ИТА Эйрвейсийн Ерөнхийлөгч Алфредо Алтавилла ажил хаялт бол үндэсний шившиг, ажилтнууд одоо байгаа нөхцөлөөрөө ажиллахаа хүлээн зөвшөөрч, хөдөлмөрийн гэрээнд гарын үсэг зурсан гэжээ. Өмнө нь Итали улсын хамгийн том нислэгийн компани байсан Алиталиад 10,500 ажилтан байсан бол тэдний 2,800 нь шинээр байгуулагдсан ИТА Эйрвейс-д үлдсэн байна.

Төрийн өмчит шинэ компани Алиталиагийн 110 онгоцны 52-ыг нь шилжүүлэн авчээ. Гэвч тэд анх байгуулагдахдаа бүхэлдээ цоо шинэ Эйрбус онгоцуудыг ашиглана гэж мэдэгдэж байсан юм.

Эх сурвалж: CNN

---