БНХАУ-ын нийслэл Бээжинд болдог марафон гүйлтийг хойшлуулах шийдвэр гарчээ. Тус улсад коронавирусийн халдварын тохиолдол нэмэгдсэн бөгөөд дараагийн шийдвэр гарах хүртэл марафон гүйлт болохгүй юм байна.

Хятадын 11 мужид халдварын 133 тохиолдол шинээр бүртгэгджээ. Цар тахлын шинэ давлагаа урьд өмнөхөөсөө илүү өргөн хүрээг хамарна гэдгийг Хятадын эрүүл мэндийн газраас анхааруулсан байна. Энэ жилийн наймдугаар сараас хойш хамгийн том давлагаа явна гэж үзжээ.

Бээжингийн марафоныг хойшлуулснаас гадна цар тахалтай холбоотойгоор Бээжин ирэх жилийн өвлийн Олимпын наадмыг халдваргүйгээр зохион байгуулж чадах эсэх нь эргэлзээтэй болж байна.

Бээжингийн марафон гүйлтийг 1981 оноос хойш жил тутам зохион байгуулж ирсэн бөгөөд Хятадын дотооддоо зохион байгуулдаг томоохон арга хэмжээнүүдийн нэг юм. Гүйлт Тяньанмины талбайгаас албан ёсоор эхэлж, Бээжингийн Олимпын цэнгэлдэх хүрээлэн дэх баярын талбайд өндөрлөдөг уламжлалтай.

Энэ жилийн марафон аравдугаар сарын 31-ний өдөр товлогдож, 30,000 орчим хүн оролцохоор бэлтгэлээ хангаж байжээ.

Эх сурвалж: ВВС

---