Японы Кюшу арлын өмнөд хэсэгт аялал жуулчлалын бүсэд байрладаг Асо галт уул оргилжээ. Лхагва гарагийн байдлаар тус галт уул халуун үнс нурмаа цацаж эхэлсэн байна. Тиймээс халуун хайлмаг урсаж, хад чулуу унахаас сэргийлж иргэдэд сэрэмжлүүлэг өгчээ.

Японы газарзүйн судалгааны агентлагийн өгсөн мэдээллээр Асо галт уул лхагва гарагийн 11:43 минутад дэлбэрсэн ба 3,5 км өндөр утаа суунаглажээ. Болзошгүй аюулаас урьдчилан сэргийлж иргэдийг нэг км-ын радиуст галт уулын Накадаке тогоонд ойртохгүй байхыг анхааруулсан байна.

Өчигдөр оройны байдлаар жуулчид сураггүй болсон болон иргэд гэмтэж бэртсэн мэдээлэл гараагүй. Галт уул ориглох үед ууланд алхаж байсан 16 уулчин эсэн мэнд буцаж иржээ. 1,592 метр өндөр галт уулын үнс нурам өнөөдөр орой хүртэл ойролцоох тосгонуудад бууна гэж цаг уурын агентлаг мэдээлжээ.

Асо галт уул нь 2019 онд бага хэмжээтэйгээр оргилсноос хойш намжмал байсан юм. Япон улсын 100 орчим жилийн түүхэнд хамгийн том галт уулын дэлбэрэлт 2014 оны есдүгээр сард болсон. Онтаке галт уул дэлбэрэхэд 63 хүн амиа алджээ.

Эх сурвалж: CNN

---