Мьянмар улсад энэ оны 2 дугаар сард болсон төрийн эргэлтийг эсэргүүцсэн жагсаалд оролцсон хэргээр шоронд хоригдож буй 5,000 гаруй хоригдлыг суллахаар болжээ.

Тус улсын цэргийн хунтын удирдагчид засгийн эрхийг гартаа авснаасаа хойш эсэргүүцлийн жагсаалд нэгдсэн олон мянган хүнийг саатуулаад байгаа юм. Тэгвэл энэхүү хунтын дэглэмийн удирдагч Мин Аун Хлаинг нийт 5,636 хоригдлыг хүмүүнлэгийн шалтгаанаар суллана гэж мэдэгджээ.

Цэргийн хүчин Аун Сан Су Чиг эрх мэдлээс нь огцруулсны дараа Мьянмарын иргэд олноороо нэгдэн, эсэргүүцлийн хөдөлгөөн эхлүүлсэн билээ. Уг цуст мөргөлдөөний үеэр дор хаяж 1,178 хүн амь үрэгдэж, 7,355 хүн баривчлагдан, яллагдагчаар татагдаад байгаа юм.

Харин Генерал Мин Аун Хлаинг энэ сарын сүүлээр болох Буддын шашны Тадингют баяр буюу Гэрлийн наадмыг тохиолдуулан олон тооны хоригдлыг суллахаар шийдвэрлэжээ. Тэрээр "Иргэд олон янзын шалтгаанаар аюулт жагсаалд оролцсон. Хоригдож байгаа болон шүүх хурлаа хүлээж байгаа иргэдийн дундаас зохих хүмүүсийг Тадингютын баяраар өршөөх болно" хэмээн мэдэгдсэн байна.

Тэрээр мөн саяхан өгсөн ярилцлагадаа Мьянмарын цэргийн хунт нь энх тайван, ардчиллын төлөө тууштай зүтгэх зорилготой хэмээн тэмдэглэсэн юм. Түүний хэлснээр шинэ Засгийн газар нь ардчиллыг сэргээх таван үе шаттай төлөвлөгөөтэй аж.

Эх сурвалж: BBC

---