ОХУ-ын Якут дахь хар тамхины эмчилгээний төвийн нэгэн өвчтөн бусад өвчтөн рүү хутга барин дайрсны улмаас нэг хүн нас барж, таван хүн шархаджээ.

Орон нутгийн Засгийн газрын хэвлэлийн албаны мэдэгдэлд "Урьдчилсан мэдээллээр, таван хүн шархдаж, нэг өвчтөн нас барсан. Хохирогчдыг Улсын 2-р эмнэлэгт шилжүүлсэн бөгөөд тэдэнд шаардлагатай эмнэлгийн тусламж үзүүлж байгаа. Амиа алдсан иргэний ар гэрийнхэнд эмгэнэл илэрхийлж байна" хэмээн бичсэн байна.

Хутгаар зэвсэглэсэн өвчтөн өнгөрөгч бямба гарагт өрөөнийхөө өвчтөнүүд рүү дайрсан болохыг эрх баригчид баталсан юм. Бүс нутгийн Эрүүл мэндийн яамны мэдээлснээр, халдлагад өртсөн гурван өвчтөний биеийн байдал хүнд байгаа бол үлдсэн хоёр хүний биеийн байдал тогтвортой байгаа аж.

Мөрдөн байцаагчид хэргийн газарт үзлэг хийн, хэргийг үргэлжлүүлэн шалгаж байна. Засгийн газрын эх сурвалжийн мэдээлснээр халдлага үйлдсэн этгээдийг баривчилжээ.

Эх сурвалж: TASS

---