“18000 хүнд даацын машин нүүрс тээвэрлэж байгаагийн гуравны нэг нь буюу 6000 нь улирал тутам С зөвшөөрөл авч байна. Үүнийг дагаад улирал тутам 12 тэрбум төгрөг авлигад явж байна” хэмээн УИХ-ын гишүүн Б.Пүрэвдорж мэдэгдсэн.

Түүнчлэн зарим нүүрс тээврийн компанийн удирдах албан тушаалтнууд манайд мэдээлэхдээ “С зөвшөөрлийг улирал тутам бус, жилд нэг удаа өгөх байдлаар зохицуулалт хийхгүй бол үнэхээр бэрхшээл үүсгэж байна. Улс ч нүүрсээ гаргаж чадахгүй, орон нутаг ч зохих татвар, хураамжгүй, компани болон ажилчид ч цалин, орлогогүй болж байна” хэмээн өгүүлсэн юм.

Энэ асуултыг бид АТҮТ-д тавилаа.

АТҮТ-ийн эх сурвалжийн мэдээлснээр С зөвшөөрлийг улирал тутам авах ёстой гэдэг журам нь БНХАУ болон Монгол улсын Засгийн газар хоорондын хэлэлцээрээр батлагдсан зүйл аж.

Тодруулбал, Монгол улсын Засгийн газар, БНХАУ-ын Засгийн газар хоорондын Авто тээврийн хэлэлцээрийг хэрэгжүүлэх тухай Монгол улсын ЗТХЯ, БНХАУ-ын Зам, тээврийн яам хоорондын протоколд орсончлон “С төрлийн зорчих зөвшөөрөл нь байнгын ачаа тээвэр хийх тээврийн хэрэгсэлд хэрэглэх бөгөөд олгосон өдрөөс эхлэн 90 хоногийн дотор олон удаа хил нэвтрэхэд хүчинтэй” хэмээн заажээ.

Хэрэв улирал тутамд бус, жилд нэг удаа олгоно гэж өөрчлөхөөр болбол Засгийн газар хоорондын хэлэлцээрт өөрчлөлт оруулах шаардлагатай юм байна.

---