Ковид-19 цар тахал БНХАУ-ын Ухань хотод анх илэрснээс хойш бараг хоёр жилийн хугацаа болох гэж байгаа ч хүн төрөлхтөн уг вирусийн гарал үүслийг тогтоож чадаагүй хэвээр байна. ДЭМБ-ын эрдэмтдийн баг Уханьд ажилласан ч мэдээлэл хомс, үйл ажиллагааны хүрээ хязгаарлагдмал байснаас коронавирусийн гарлыг тогтоож чадаагүй хэмээн тайлбарладаг.

Тэгвэл энэ удаа ДЭМБ Саго буюу Шинэ төрлийн өвчин үүсгэгчийн гарал үүслийг судлах шинжлэх ухааны зөвлөлийн багт 26 эрдэмтнийг Ухань руу илгээхээр санал дэвшүүлээд байгаа юм. Энэ удаад эрдэмтэд вирус Уханий зах дээр амьтнаас хүнд халдсан уу, аль эсвэл лабораториос алдагдсан уу гэдгийг тогтоох ажээ.

Хятадын Засгийн газар коронавирусийг лабораториос алдагдсан гэх таамгийг эрс эсэргүүцсээр ирсэн юм. Өнгөрсөн хоёрдугаар сард Уханьд ажилласан ДЭМБ-ын баг Ковид-19 сарьсан багваахайнаас хүнд халдсан байж болзошгүй гэсэн таамгийг дэвшүүлсэн боловч мэдээллийг баталгаажуулахын тулд дахин ажиллах шаардлагатай гэдгийг хэлж байсан.

Энэ удаа Уханийг зорих багт өмнө нь Уханьд ажилласан зургаан эрдэмтэд багтаж байгаа. ДЭМБ-ын удирдлагын зүгээс Ковид-19-ийн үүсэл гарлыг тогтоох сүүлийн боломж ч байж магадгүй гэдгийг онцлон тэмдэглэжээ. ДЭМБ-ын тэргүүн Тедрос Адханом Гебрейесус вирусийн үүсэл гарлыг тогтоох нь ирээдүйд цар тахал дахин тархахаас сэргийлэхэд чухал ач холбогдолтой гэжээ.

Эх сурвалж: ВВС

---