БНАСАУ-ын Хөдөлмөрчдийн намын үүсэн байгуулагдсан 76 дахь ойн баярын хүрээнд даваа гарагт Пхеньянд "Өөрийгөө хамгаалах батлан хамгаалахын хөгжлийн үзэсгэлэн-2021" арга хэмжээг зохион байгуулжээ. Өмнөд Солонгосын хэвлэлүүдийн мэдээлснээр Умард Солонгост анх удаа болж буй үзэсгэлэн, арга хэмжээн дээр удирдагч Ким Жон Ун үг хэлсэн байна.

Тэрээр АНУ-ын зүгээс дайсагнасан бодлого баримталж байгаа энэ үед дайны зориулалтаар бус өөрийгөө хамгаалах зорилготойгоор ялагдашгүй хүчирхэг арми бүрдүүлнэ гэдгээ мэдэгджээ. Уг батлан хамгаалах салбарын арга хэмжээн дээр хэд хэдэн төрлийн аварга том пуужингууд, танкуудыг дэлгэн харуулсныг эх сурвалжууд дамжуулав.

Умард Солонгос сүүлийн нэг сарын хугацаанд хэд хэдэн удаа дуунаас хурдан болоод цөмийн чадамжтай пуужингуудын туршилтыг хийсэн юм. Удирдагч Ким дийлдэшгүй хүчирхэг армийг бүрдүүлэх нь хэн нэгэнд дайсагнасан, дайныг эхлүүлэх гэсэн үйлдэл биш гэдгийг онцлон тэмдэглэж, улсынхаа бүрэн бүтэн тусгаар эрхт байдлыг хамгаалж, дайнаас урьдчилан сэргийлэх зорилготой гэдгийг тодорхой хэлжээ.

Мөн АНУ-ын дайсагнасан үйлдэл Солонгосын хойгт Умард ба Өмнөд Солонгос хөрш орнуудын харилцааг хүйтрүүлэхэд ч нөлөөлж байгааг дурдсан байна. АНУ-ын Ерөнхийлөгч Жо Байден Умард Солонгостой яриа хэлэлцээр хийхэд бэлэн гэдгээ удаа дараа илэрхийлсэн ч Пхеньяны эсрэг хориг арга хэмжээг сулруулахаас урьтаж цөмийн зэвсэггүй орон болохыг шаардаж байгаа. Гэвч Умардын тал уг шаардлагыг биелүүлэхээс хэзээнээс татгалзсаар ирсэн билээ.

Эх сурвалж: ВВС, The Guardian

---