Коронавируст цар тахал гарснаас хойш дэлхийн улс орнууд хилээ хааж, халдварын тархалт өндөр улс орнуудын өмнө хаалгаа барьсан. Тэгвэл Их Британи улс улаан жагсаалтад оруулж, хилээ хаасан 54 орны жагсаалтаас 47 улсыг хасч, долоон улсыг үлдээжээ.

Хилийн хоригоос хассан 47 орны тоонд Аргентини, Боливи, Афганистан, Гүрж, Мьянмар, Парагвай, Балба болоод Монгол улс багтсан байна. Их Британийн Тээврийн сайд Грант Шаппс уг шийдвэр ирэх долоо хоногийн даваа гарагаас хэрэгжиж эхэлнэ гэжээ.

Мөн тэрээр 47 улсыг улаан жагсаалтаас хассанаар тээвэр зуучлал, аялал жуулчлал удаан хугацааны дараа эргэн нээгдэж байгааг тэмдэглэсэн чухал алхам гэдгийг онцолсон байна. Агаарын тээврийн салбар эргэн сэргэхээс гадна цар тахлын үед тусдаа байсан гэр бүлүүд эргэн уулзах боломжтой боллоо гэжээ.

Их Британийн Засгийн газар Панам, Колумб, Венесуэл, Перу, Эквадор, Гайти, Доминикан улсуудыг улаан жагсаалтад үлдээсэн байна.

Эх сурвалж: ВВС

---