Пакистаны Балочистан мужийн нутаг дэвсгэрт өнөөдөр өглөө газар хөдөлсөн тухай мэдээллээ. Газар хөдлөлтийн улмаас хамгийн багадаа 20 орчим хүн нас баржээ.

Тус улсын онцгой байдлын алба нас барсан болоод хохирол амссан иргэдийн тоо цаашид нэмэгдэж болзошгүй гэдгийг анхааруулсан байна. Балочистан мужийн нийслэл Куэтта хотод газар хөдлөлтийн чичирхийлэл мэдрэгдсэний дараа иргэд гадаа гудамжинд гарч зогсож буй зургийг цахим сүлжээнд нийтэлжээ.

Одоогоор газар хөдлөлтийн хүчийг 5,7 магнитуд байсан гэж тодорхойлж байна. АНУ-ын Газарзүйн судалгааны газраас газар хөдлөлтийн голомт хөрсний гүний 20 км-т, Куэтта хотоос зүүн тийш 100 км-т пүрэв гарагийн үүрээр 03:00 цагийн үед бүртгэгдсэн гэжээ.

Газар хөдлөх үед байшин барилга нурсны улмаас иргэд дарагдаж амиа алдсан гэдгийг мужийн эрх баригчид мэдээлсэн байна. Нас барсан хүмүүсийн дунд бага насны зургаан хүүхэд байгаа ажээ.

Хамгийн их хохирол амссан хотыг Харнай гэж мэдээлсэн. Тус хотод автозамуудыг хааж, гэрэл цахилгаан тасарч, гар утасны сүлжээ унасан байна.

Эх сурвалж: ВВС, The Guardian

---