ЭМЯ-аас “Ковид 19” цар тахлын нөхцөл байдлын мэдээг 2021 оны аравдугаар сарын 6-ны байдлаар хүргэлээ.
Улсын хэмжээнд сүүлийн 24 цагийн хугацаанд 2409 тохиолдол шинээр илэрсэн байна. Үүний 1316 нь нийслэлд, 1092 нь орон нутагт бүртгэгджээ. Харин хоногт 7813 хүн эдгэрсэн байна.

Хоногт 14 хүн нас барж, нийт нас баралтын тоо 1303 болсон байна. Нас барсан иргэдийн 7 нь эрэгтэй, 7 нь эмэгтэй байсан бөгөөд 0-20 насны нэг, 41-60 насын гурав, 61-80 насны зургаа, 80-аас дээш насны дөрвөн хүн нас баржээ. Нас барсан иргэдийн ар гэр, төрөл төрөгсдөд гүн эмгэнэл илэрхийлье.

Орон нутагт халдварын тоо өндөр хэвээр байна. Нийт тохиолдлын тоо 10 мянгаас дээш гарсан найман аймаг байна. Өнгөрсөн 24 цагийн хугацаанд 100-аас дээш тохиолдол бүртгэгдсэн аймгуудыг танилцуулъя. Дорноговь 162, Төв аймагт 303, Хэнтий 108 тохиолдол бүртгэгджээ.

Эмнэлэгт хэвтэн эмчлүүлж байгаа иргэдийн тоо 22158 байгаа бол гэрийн хяналтад 55363 хүн өрхийн эмчийн хяналтад эмчилгээ үйлчилгээ авч байна. Эмнэлэгт хэвтэн эмчлүүлж байгаа нийт өвчтөнүүдийн 13227 нь хөнгөн, 6487 нь хүндэвтэр, 2098 нь хүнд, 346 нь маш хүнд өвчилсөн иргэд байна. Үүнээс эмнэлэгт 3960 хүүхэд, 1521 жирэмсэн эмэгтэй хэвтэн эмчлүүлж байна.

---