Филиппин улсын дарангуйлагч агсан Фердинанд Маркосын хүү ирэх жилийн Ерөнхийлөгчийн сонгуульд нэр дэвшихээ албан ёсоор зарлалаа. Фердинанд Маркос Жр буюу Бонгбонг гэх нэрээрээ танигдсан 64 настай улс төрч өөрийн Facebook хуудсаараа дамжуулан сонгуульд нэр дэвшихээ мэдэгджээ. Тэрбээр эх орондоо нэгдсэн удирдлагыг бий болгоно гэдгээ амласан байна.

Маркос Жр-ын эцэг 1986 он хүртэл 20 жилийн турш Филиппин улсыг дарангуйлжээ. Тэрээр 1972 онд төрийг удирдах эрх мэдлийг гартаа авсан. Хоёр дахь удаагаа төр удирдахаасаа жилийн өмнө дайны хууль хэрэгжүүлж, конгрессыг түгжин, улс төрсийн өрсөлдөгчдөө баривчлахыг тушаасан байна.

Эцэг Фердинанд Маркосын дарангуйллын он жилүүдэд сөрөг хүчнийхний эсрэг хүч хэрэглэж, шүүхийн бус аргаар олон хүний амийг хороосон юм. Тэрээр 1989 онд Хавайд цөллөгт байхдаа нас баржээ. Ганц хүү нь болох Маркос Жр 2010-2016 оны хооронд Сенатын гишүүн байсан бөгөөд удаан хугацаанд улс төрд хүчин зүтгэж байгаа юм.

Тус улсын өнөөгийн Ерөнхийлөгч Родриго Дутерте Үндсэн хуулийн дагуу дахин нэр дэвших эрхгүй болсон. Шинээр сонгогдох Ерөнхийлөгчийн төлөө өрсөлдөх хүмүүс тодорсоор байна. Тухайлбал дэлхийн боксын аварга Мэнни Пакьяо, нийслэл Манила хотын захирагч Франциско Домагосо нар нэр дэвшихээ зарласан билээ.

Эх сурвалж: ВВС

---