Facebook компанид бүтээгдэхүүн хариуцсан менежерээр ажиллаж байсан Фрэнсес Хауген гэгч эмэгтэй АНУ-ын Сенатын танхимд үг хэлсэн байна. Тэрээр өөрийн ажиллаж байсан дэлхийн хамгийн олон хэрэглэгчтэй цахим сүлжээ Facebook-ыг хэрэглэгчдийнхээ эрх ашгаас илүү өөрсдийн ашиг орлогыг нэн тэргүүнд тавьдаг, хүүхдүүдэд халтай, ардчиллыг доройтуулсан үйл ажиллагаа явуулдаг хэмээн шүүмжилжээ.  

Харин сар бүр 2,7 тэрбум хүн идэвхтэй ашигладаг Facebook компанийн зүгээс  хатагтай Хауген өөрт хамааралгүй байсан, ямар нэг ойлголт мэдээлэлгүй салбарынхаа тухай ярьж байна хэмээн шүүмжилсэн байна. Тус компани WhatsApp, Instagram хуудсуудыг давхар ажиллуулдаг бөгөөд олон зуун сая идэвхтэй хэрэглэгчтэй. Гэвч тэдгээр хэрэглэгчдийн мэдээллийг хамгаалдаггүй гэх мэтчилэн хүндхэн сорилт, шүүмжтэй тулгарсаар ирсэн.

Хатагтай Хаугены тайлан мэдээллийн дараа АНУ-ын Сенатын танхим дахь Бүгд Найрамдах болон Ардчилсан намын гишүүд тус компанид өөрчлөлт, шинэчлэлт хийх шаардлагатай гэдэгт санал нэгдсэн юм. Хоёр намын гишүүд санал нэгдэх тохиолдол тун ховор ажээ. Facebook компани Хаугены мэдэгдэлд шүүмжтэй хандсан ч өөрчлөлт, шинэчлэлт хийх шаардлагатай гэдэгтэй санал нэгдсэн байна.

Эх сурвалж: ВВС

---