Монгол Улсын үндэсний үндэсний үйлдвэрлэгч “Эхлэл” брендийн инженерүүд олон жил хөдөлмөрлөсний дүнд “Хулан-21 PLUS” хэмээх анхны ухаалаг гар утсыг бүтээсэн тухайгаа зарлаж, есдүгээр сарын 21-ний өдөр ёслол төгөлдөр нээлт хийн, худалдаанд гаргасан.

Гэвч “Эхлэл” брендийнхэн БНХАУ-д угсруулсан 4440 гар утсаа Монгол Улс руу оруулахдаа “Гар утасны эх хавтан, зай хураагуурын таг” хэмээн хуурамч мэдүүлэг бүрдүүлэн өгч 175,9 сая төгрөгийн татвараас зайлсхийсэн нь урьдчилсан байдлаар тогтоогдсон хэмээн өнөөдөр ГЕГ-аас мэдээллээ.

Мөн ГЕГ-аас “Эхлэл” брендийн “Хулан-21” PLUS гар утас нь БНХАУ-ын “Doogee X96 PRO” гар утастай яг ижилхэн болохыг ч олж илрүүлснээ мэдээллээ.

БНХАУ-ын “Doogee X96 PRO” маркийн гар утасны глобал хувилбар нь албан ёсны дэлгүүртээ 155.99 ам.доллараар худалдагддаг бөгөөд Монголбанкны өнөөдрийн нэрлэсэн ханшаар тооцож үзвэл 455,797 төгрөгийн үнэтэй байдаг аж. Үүндээр НӨАТ-ын 10, гаалийн 5 хувийн татвараа нэмж тооцвол монгол улсад 524,166 төгрөгөөр орж ирдэг аж.

Харин үндэсний гэх тодотголтой “Хулан-21” PLUS утас нь албан ёсны дэлгүүртээ 599,999 төгрөгөөр худалдаалагдаж байгаа юм байна.

---