Францын католик сүм доторх хүчирхийллийг шалган мөрдөж буй хорооны мэдээллээр 1950 оноос хойш насанд хүрээгүй хүүхэдтэй хурьцах мянга мянган гэмт хэрэг үйлдэгджээ. Тус улсын католик сүмүүдэд 115,000 лам, санваартан байснаас 3,200 гаруй нь насанд хүрээгүй хүүхдүүдээр бэлгийн гаж донгоо гүйцэлдүүлж байсныг хороо тогтоосон байна.

Хороог ахалж буй Жан Марк Суве дээрх танилцуулсан мэдээлэл нь хамгийн багаар тооцож мэдээлсэн дүн гэдгийг онцлон тэмдэглэжээ. Католик сүм доторх хүчирхийллийн гэмт хэргийг шалгах хороо нь сүмийн үйл ажиллагаа, цагдаа шүүхийн архивын баримт, хохирогчидтой хийсэн уулзалтын дүнд дээрх баримтыг дэлгэсэн байна.

Бие даасан шалган мөрдөх хороог Францын католик сүм 2018 онд байгуулж, дотоод үйл ажиллагаагаа шалгуулж эхэлжээ. Хорооны тэргүүлэгч Сувегийн Le Monde сонинд өгсөн ярилцлагад гэмт хэргийн шинжтэй 22 үйлдлийн нотлох баримтыг прокурорын байгууллагад шилжүүлсэн гэжээ.

Мөн гэмт хэрэгт холбоотой зарим хамба, сүмийн удирдах ажилтнууд одоо ч амьд сэрүүн байгаа аж. Тусгай хороог бүрдүүлэхдээ эмч, түүхч, социологич, номлогчдыг багтаасан байна. Өнгөрсөн хоёр жил хагасын хугацаанд 6,500 гаруй хохирогч, гэрч хороонд хандсаны дүнд 2,500 хуудас бүхий тайланг гаргажээ.

Уг мэдээллийг католик сүмийн 500 жилийн түүхэн дэх хамгийн хүнд явдал хэмээн шашны сонин, сэтгүүлүүдэд нийтэлж байна. Ромын пап Францис энэ жилийн эхэнд Католик сүмийн хуулинд нэмэлт өөрчлөлт оруулж, бэлгийн хүчирхийллийг илтэд гэмт хэрэгт тооцохоор болсон юм. Ингэснээр христийн сүм хийдүүдийг удирдах Каноны хуулиар бэлгийн хүчирхийлэл, насанд хүрээгүй хүүхдүүдийг боолчлох, хүүхдийг садар самуунд ашиглах зэргийг хүнд гэмт хэрэгт тооцох шинэ дүрмүүд бий болжээ.

Эх сурвалж: ВВС

---