ОХУ-ын харьяат Карачай-Черкеси улсад террорист халдлага үйлдэхээр төлөвлөж байсан этгээдийг Холбооны аюулгүй байдлын албанаас баривчилжээ. Сэжигтэн нь Бүгд Найрамдах Кабардино-Балкари Улсын иргэн бөгөөд "Исламын улс" террорист бүлэглэлийн захиалгаар ажиллаж байсан гэж Холбооны аюулгүй байдлын албаны Олон нийттэй харилцах төв "ТАСС" агентлагт мэдээлсэн байна.

Тус мэдэгдэлд "Хууль сахиулах байгууллагын ажилтнуудын эсрэг террорист халдлага үйлдэх гэж байсан этгээдийг Карачай-Черкесийн Холбооны аюулгүй байдлын албанаас таслан зогсоолоо. 2001 онд төрсөн сэжигтэн нь "Исламын улс" алан хядлагын бүлгийн зааварчилгааны дагуу халдлага үйлдэхээр төлөвлөж байсан бөгөөд одоо түүнийг саатуулаад байна" хэмээн тэмдэглэжээ.

Халдлагад бэлдэж байсан этгээдийн гэрээс гар хийцийн тэсрэх төхөөрөмж хийх эд анги, багаж хэрэгслийг хураан авсан төдийгүй террорист байгууллагын гишүүдтэй харилцаж байсан нотолгоог гар утаснаас нь олсон байна.

Тэгвэл сэжигтэн мөрдөн байцаалтын үеэр хэргээ хүлээсэн болохыг албаны эх сурвалж мэдээлжээ. Одоо түүнд ОХУ-ын Эрүүгийн хуулийн Террорист ажиллагаа төлөвлөх болон Террорист байгууллагын үйл ажиллагаанд оролцох зүйл ангийн дагуу эрүүгийн хэрэг үүсгэн, шалгаж байгаа аж.

Эх сурвалж: TASS

---