ОХУ-ын газрын теннисний тамирчин Елена Веснина хулгайд алдаад байсан Олимпын хоёр медалиа хүргэлтээр ирсэн шоколадны хайрцгаас олжээ. Веснинагийн хэлснээр, хүргэлтийн ажилтан түүний гэрт хайрцаг шоколад ба цэцгийн баглаа авчирсан бөгөөд тус хайрцаг дотор медалиуд нь байсан аж.

Үүнээс гурван долоо хоногийн өмнө буюу өнгөрөгч 9 дүгээр сарын 11-ний өдөр Веснина нөхөртэйгөө гадуур хооллож байх үеэр Москвагийн Истра дүүрэгт байрлах түүний байшинд хулгай орсон юм. Тухайн үед тэрээр гэрийнхээ дохиоллын системийг асаахаа мартсан гэж мэдүүлсэн билээ.

Үл мэдэгдэх сэжигтнүүд Веснинагийн гэрт нэвтэрч, түүний Олимпын алт болон мөнгөн медаль, Аваргын бөгж, үнэт эдлэл, бугуйн цаг ба бусад үнэт зүйлийг хулгайлж, сейфийг нь онгойлгожээ. Удалгүй цагдаа нар хулгайн хэргээр эрүүгийн хэрэг үүсгэн, шалгаж эхэлсэн хэдий ч амжилт олоогүй байсан юм.

Веснина энэ талаар "Хоёр медалиа хоёуланг нь буцааж авсан. Хүргэлтийн ажилтны авчирсан сарнай цэцгийн баглаанд миний Аваргын алтан бөгж байсан бол шоколадны хайрцаг дотор медалиуд маань байсан. Одоо албаныхан хоёр медалийг маань биологийн шүүх шинжилгээнд оруулж байгаа" хэмээн "ТАСС" агентлагт ярьжээ.

35 настай Елена Веснина 2016 онд Бразилын Рио-де-Жанейро хотод болсон Зуны олимпын наадмаар газрын теннисний эмэгтэй хосын төрөлд алтан медаль хүртсэн бол "Токио-2020" олимпын наадмын холимог хосын төрөлд мөнгөн медаль хүртсэн юм.

Эх сурвалж: TASS

---