Умард Солонгос улс өчигдөр буюу мягмар гарагийн өглөө дахин нэг пуужинг Японы тэнгист туршсан тухай мэдээлсэн. Уг пуужинг баллистик пуужин байж магадгүй гэсэн таамгийг Япон, Өмнөд Солонгосын албаныхан дэвшүүлээд байсан юм.

Тэгвэл БНАСАУ-ын талаас Хуасонг-8 нэртэй дуунаас хурдан пуужингийн туршилт хийсэн гэдгээ мэдэгдсэн байна. Тус улсын төрийн мэдлийн сувгаар таван жилийн турш үргэлжлэх цэрэг армийн хөгжлийн төлөвлөгөөнд тусгагдсан шинэ зэвсгүүдийн таван чухал системийн нэг байсан хэмээн мэдэгджээ. Мөн уг шинэ төрлийн пуужин нь стратегийн зэвсэг бөгөөд цөмийн хошуугаар цэнэглэх чадамжтай байна.

Төрийн мэдлийн сувгийн дамжуулснаар Умард Солонгос улс аль ч замаар өөрийгөө хамгаалах хүчин чадалтай болохыг харууллаа гэжээ. Мягмар гарагт харвасан пуужин нь энэ сард тус улсын хийсэн гурав дахь удаагийн туршилт юм.

Дуунаас хурдан пуужингууд нь энгийн баллистик пуужингуудаас илүү хурдан бөгөөд пуужингийн довтолгооноос хамгаалах системээр зогсооход хүндрэлтэй ажээ. Мөн Умардын төрийн мэдлийн сувгийн хийсэн мэдэгдэлд пуужингийн шингэн шатахуун тээвэрлэх ампулыг анх удаа танилцуулсан ба энэ ампул нь пуужин хөөргөхийн өмнө бэлтгэх хугацааг илүү богиносгож хялбарчлахад тустай ажээ.

Эх сурвалж: ВВС

---