Испанийн Ла Палма арал дээр дэлбэрсэн галт уулын халуун хайлмаг урссаар тэнгисийн усанд хүрчээ. Эрдэмтэд халуун хайлмаг тэнгисийн усанд асгарвал хорт хий ялгаруулж, томоохон тэсрэлт дэлбэрэлт болж магадгүй хэмээн сэрэмжлүүлээд байсан юм.

Кумбре Виежа галт уулын хайлмаг орон нутгийн цагаар мягмар гарагийн шөнө Атлантын далайн усанд хүрчээ. Час улаан хайлмаг ус руу орох үед үүл мэт цагаан уур савссан байна. Уг уур нь химийн хортой хлорт бодис ялгаруулж байж болзошгүй. Энэ нь арьс, нүдийг гэмтээж үрэвсүүлэх болон амьсгалахад хүндрэл учруулж болзошгүй байна.

Ла Палма арал дээрх галт уул есдүгээр сарын 19-ний өдөр дэлбэрснээс хойш олон зуун барилга байшин өртөж сүйтгэгдсэн ба 6,000 орчим иргэнийг нүүлгэн шилжүүлээд байгаа юм. Хайлмаг тэнгисийн усанд асгарснаар хорт хий ялгарахаас гадна эргийн хэсэг нурж болзошгүй ажээ.

Эргийн дагуу байрладаг гурван тосгоны оршин суугчдын аюулгүй байдлыг хамгаалахын тулд хөл хорьсон байна. Испани улсын Засгийн газрын зүгээс байгалийн гамшгийн бүсэд байрладаг тул тус арал дээр хохирол амссан бүх иргэний хохирлыг барагдуулах санхүүгийн дэмжлэг үзүүлэхээ мэдэгдээд байгаа юм.

Эх сурвалж: ВВС

---