АНУ-д 2020 онд бүртгэгдсэн хүн амины хэргийн тоо өмнөх оныхоос 30 орчим хувиар өсөж, нийт 21,500 орчим тохиолдолд хүрсэн тухай тус улсын Холбооны мөрдөх товчооноос мэдээлжээ.

Энэ нь тус товчоо 1960-аад онд мэдээлэл цуглуулж эхэлснээс хойш бүртгэгдсэн хамгийн огцом өсөлт аж. АНУ-д өнгөрсөн оны 6 дугаар сараас эхлэн хүн амины хэргийн тоо эрс нэмэгдсэн бөгөөд тус улсын бүх хэсэг нэрвэгдэх болсон байна.

Холбооны мөрдөх товчооны нэгдмэл гэмт хэргийн тайланд дурдсанаар 2020 онд гарсан аллагын 77 хувь нь галт зэвсгээр үйлдэгдсэн бөгөөд 2019 онд энэ үзүүлэлт 74 хувьтай байжээ. Мэргэжилтнүүд хүн амины хэргийн тоо өссөн талаар тодорхой тайлбар өгөөгүй байгаа хэдий ч коронавирусийн цар тахлын улмаас үүссэн тогтворгүй байдал болон галт зэвсгийн борлуулалт нэмэгдэж байгааг онцолсон байна.

Дэлхийн банкнаас гаргасан тоо баримтаас үзвэл, 2018 онд АНУ-д 100 мянган оршин суугч тутамд 6.5 хүн амины хэрэг гарч байсан бол Мексикт 35, Бразилд 27, ОХУ-д найм, харин Францад нэг гэж бүртгэгджээ.

Эх сурвалж: AFP

---