Түлш, шатахууны хомстол дан ганц Монгол Улсыг дайрсангүй. Дэлхий нийтээр шатахууны нийлүүлэлт хангамжийн асуудал хүндэрч, зарим улс оронд шатахуунтай холбоотой эмх замбараагүй байдал бий болоод байна.

Тухайлбал энэ сарын 20-ноос  эхлэн Их Британийн нутаг дэвсгэрт шатахууны түгээлт, нийлүүлэлт огцом буурч, томоохон газрын тос нийлүүлэгч Бритиш Петролиум компани 1,200 гаруй шатахуун түгээх станцаа хаажээ. Учир нь ачааны том оврын автомашины жолоочийн хомстол үүсч, газрын тосны үйлдвэрүүд цар тахлаас шалтгаалан хэвийн ажиллаж чадахгүй байгаа, БРЕКСИТ зэрэг олон талын асуудлаас үүдэн  шатахуун тээвэрлэлт тасалдаад байгаа юм.

Шатахууны түгээлт тасалдсантай холбогдуулан Их Британийн иргэд, олон нийт хомстол үүснэ хэмээн сэрэмжилж, шатахуун түгээх станц дээр хэдэн өдрөөр дугаарлаж, урт дараалал үүсгэн, жолооч нарын хооронд зодоон гарч, эмх замбараагүй байдал үүсч байна.

Их Британийн шатахуун түгээх станцууд цагдаагийн хамгаалалтыг чангаруулж, шатахуун түгээх ажилд армийн албан хаагчдыг дайчлахаар болсон байна. Том оврын автомашинууд жолоочгүй болсноос дэлгүүрүүд бараагаа татаж авч чадахгүйд хүрэн, лангуунууд нь хоосорч байгаа тухай зарим эх сурвалж мэдээлэв.

Хэдийгээр Их Британийн эрх баригчид шатахууны хомстол үүсээгүй тул иргэд, олон нийт цочирдож шатахуун түгээх станцуудад урт дараалал үүсгэхгүй байхыг уриалж байгаа ч гадны ажилчдад улирлын виз олгож, ажиллах хүч татан авах асуудал эрх баригчдын түвшинд яригдаж байна. Даваа гарагт Их Британийн Парламентад энэ талаар хэлэлцэж магадгүй гэж ВВС агентлаг мэдээлжээ. Уг хямрал энэ жилийн 12 дугаар сар хүртэл үргэлжилж болзошгүй гэж зарим ажиглагчид таамаглаж байна.

---