Афганистаны төрийн эрхийг талибанчууд булааснаас хойш исламын шашны шариатын хуулийг мөрдүүлж эхлээд байна. Тухайлбал Хелманд мужид нийтийн халуун усны газар болон үсчинд сахал хусах, хөгжим тавихыг хоригложээ.

Өнгөрсөн долоо хоногийн ням гарагт хийсэн мэдэгдэлдээ мужийн эрх баригчид ард иргэдэд энэ тухай сануулсан байна . Хэрэв үсчин болоод нийтийн халуун усны газарт хэн нэгний сахлыг хусах, хөгжим дуугаргах юм бол шариатын хуулийн дагуу шийтгэх ба тэдэнд гомдол мэдүүлэх эрх үгүй гэжээ.

Талибаны эрх баригчид урьд өмнө төр барьж байсан цагаас энэ удаад илүү уян хатан хууль баримталж, зөөлөн хандаж байгаа хэмээн мэдэгдээд байгаа юм. Гэвч тэд сэтгүүлчдийг баривчлах, охид эмэгтэйчүүдийн эрхийг хасах, гэмт хэрэгтнүүдийг олон нийтийн өмнө цаазаар авах зэрэг таагүй үйлдлүүдийг гаргасаар байгаа тухай эх сурвалжууд мэдээлж байна.

Эх сурвалж: CNN

---