Өмнөд Солонгост өнгөрсөн онд хувь хүний болон аж ахуйн нэгжийн дампуурал хоёр оронтой тоогоор өссөн болохыг албан ёсны тайланд дурджээ. Энэ нь коронавирусийн цар тахлын үеийн эдийн засгийн хямралаас үүдэлтэй гэж шинжээчид үзэж байгаа аж.

Тус улсын Үндэсний шүүхийн захиргаанаас гаргасан тайланд 2020 онд бүртгүүлсэн хувь хүний дампуурлын тоо өмнөх оноос 10.4 хувиар өсөж, нийт 50,379 хэрэг болж нэмэгдсэн байна. Харин аж ахуйн нэгжийн дампуурлын тоо 1,069 гэж бүртгэгдсэн нь 2019 оны мөн үеийнхээс 14.8 хувиар өссөн үзүүлэлт болохыг албаныхан онцолжээ.

БНСУ-д 2004 оноос хойш аж ахуйн нэгжийн дампуурлыг бүртгэж эхэлснээс хойш энэ тоо мянга давсан анхны тохиолдол гарсан нь энэ юм. Хувь хүний болон аж ахуйн нэгжийн дампуурлын огцом өсөлт нь цар тахлын дэгдэлт болон үүнтэй холбоотой эдийн засгийн агшилтаас үүдэлтэй байж магадгүй гэж мэргэжилтнүүд үзэж байна.

Түүнчлэн, тус улсад үл хөдлөх хөрөнгийн үнэ өссөнтэй холбоотойгоор үл хөдлөх хөрөнгийн дуудлага худалдаанд оролцох хүсэлтийн тоо 9.8 хувиар буурчээ. Үл хөдлөх хөрөнгийн зах зээл өсөх үед борлуулалтыг ихэвчлэн зах зээл дээр шууд хийдэг тул дуудлага худалдааны тоо буурдаг аж.

Эх сурвалж: Yonhap News Agency

---