Исао Какехи 75 настай ч эрүүл саруул, хүчирхэг эр байсан бөгөөд 2013 онд Чисако Какехи гэгч 67 настай бэлэвсэн эмэгтэйтэй зуучлах товчоогоор дамжуулан танилцаж, хайр дурлалын харилцаатай болжээ. Тэд танилцаад хэдхэн сарын дотор гэрлэхээр болсон байна. Шинэ жилийн баярт зориулж будааны боов хийж идсэн ч Исао он гарахын өмнөхөн учир битүүлгээр амьсгал хураажээ.

Японд нас барсан хүмүүсийг задлан шинжилгээнд оруулах нь ховор тохиолдол боловч түүний үхэл тун сэжигтэй байсан тул задлан шинжилгээ хийхэд зүрх, цус, ходоодноос нь цианид илэрсэн байна. Мөн байрнаас нь уудаг байсан эмнийх нь хоосон капсулууд олджээ. Хэргийн нотлох баримтууд дээр үндэслэн хатагтай Какехийг сэжигтнээр татан баривчлан саатуулж, эцэст нь Исаогаас гадна урьд өмнө дотно харилцаатай байсан Хонда, Хиоки, Суэхиро нарыг ч мөн цианидаар хордуулж амь насыг нь хороосон хэрэгт буруутгасан байна. 2017 онд эмэгтэйд цаазын ял оноож, давж заалдах шүүх хуралд өнгөрсөн зургадугаар сард ялагдал хүлээснээр, ялыг удахгүй гүйцэтгэх ажээ.

“Хар бэлэвсэн эмэгтэй” хэмээн хочлогдоод буй энэ жил 74 настай эмэгтэй 2007 онд 61 настай байхдаа анхны хэргээ үйлдсэнийг 2014 онд хийсэн баривчилгаа, мөрдлөг шалгалтын үеэр тогтоожээ. Эмэгтэй 1969 онд анхны нөхөртэйгээ 23 настайдаа гэрлэж, 25 жилийн хамтын амьдралын эцэст 1994 онд нөхөр нь өвчний улмаас таалал төгссөн байна.

2007 оноос эхлэн өөрөөсөө ахмад настай эрчүүдтэй зуучлалын товчоогоор дамжуулан танилцаж, тэдэнтэй дотно харилцаа үүсгэн гэрлэхээр болдог ч уг эрчүүд учир битүүлгээр таалал төгсөж байжээ. Цагдаа нар түүнийг мөнгөний төлөө дээрх гэмт хэргүүдийг үйлдсэн гэж үзэж байгаа юм. Японы хэвлэлүүдэд эмэгтэй дөрвөн хохирогч болон тэдгээрийн гэр бүлүүдээс 500 сая иений эд хөрөнгө, мөнгө авч үлдсэн гэж бичжээ.

Япон улсад “хар бэлэвсэн эмэгтэй” гэж нэрлэгдсэн 46 настай Канае Кижимагийн өөр нэг хэрэг бүртгэгдсэн байдаг. Тэр сохор болзооны апп ашиглан залуустай уулзсаныхаа дараа амиа егүүтгэсэн болгож үлдээгээд амь насыг нь хороодог байж. Уг хэрэг мөн л мөнгөнөөс болсон гэж үздэг бөгөөд 100 хоног үргэлжилсэн шүүх хурлын дараа 2012 онд түүнд цаазын ял оноож байжээ.

Тус улсын хамгийн их эрэлт хэрэгцээтэй болзооны 10 апп-д 32 сая гаруй хэрэглэгч бүртгэлтэй байдаг байна.

Эх сурвалж: CNN

---