Одоогоос яг долоо хоногийн өмнө буюу есдүгээр сарын 20-ны өдөр монголчууд шатахууны хомстолд орсноо гэнэт мэдэцгээж байлаа.

АМГТГ-ын дарга Ц.Эрдэнэбаярын “Монгол Улс автобензины 20 хоногийн нөөцтэй” гэх худал үгэнд итгэснээс үүдэн Монголын ард иргэд өнгөрсөн долоо хоногийг нэлээд хүндхэн нөхцөл байдалтай л өнгөрүүллээ. Шатахууны нөөц гэнэт тасалдсан шалтгааныг УУХҮ-ийн сайд Г.Ендон олон нийтэд худал тайлбарласан нь өнөөдөр мөн тодорхой болов. Ингээд АМГТГ-ын дэд дарга Ц.Эрдэнэбаяр  болон УУХҮ-ийн сайд Г.Ёндон нарын худал мэдээллийг нягталснаа та бүхэнд хүргэе.

2021 оны есдүгээр сарын 21

УУХҮ-ийн сайд Г.Ёндон, АМГТГ-ын АМГТГ-ын Газрын тосны асуудал хариуцсан орлогч дарга Ц.Эрдэнбаяр нар хэвлэлийн бага хурал зохион байгуулав.

УУХҮ-ийн сайд Г.Ёндон “Роснефть” компанийнхан есдүгээр сард 17 мянган тонн АИ-92 шатахуун нийлүүлэх боломжтой гэж мэдэгдсэн учир бид БНХАУ-ын “Чайна ойл” компанитай гэрээ байгуулж, мөнгөө урьдчилан төлж, вагоны кодоо авсан байсан. Гэвч БНХАУ-ын төмөр замын тээвэр хэт ачаалалтай байгаагаас үүдэн гэрээ байгуулж, мөнгөө төлсөн мөртлөө бид бүхэн БНХАУ-аас энэ сардаа багтаан шатахуун импортлох боломжгүй боллоо хэмээн хэлсэн.

2021 оны есдүгээр сарын 22

БНХАУ-аас Монгол улсад суугаа Элчин сайд Цай Вэньруй өдөр тутмын сонинд өгсөн ярилцлагадаа:

-Монголын тал есдүгээр сарын 22-ны өдөр Хятадын талд яаралтай шатахуун нийлүүлэх хүсэлтээ албан ёсоор гаргасан. Хятадын тал уг хүсэлтийг авсан даруйдаа буюу есдүгээр сарын 22-ны өдөрт нь багтааж зохицуулалт хийсэн төдийгүй БНХАУ-ын Эрээн боомт руу АИ-92 шатахуун илгээсэн хэмээн “Өдрийн сонин”-д ярьсан байх юм.

FACTCHECK: Үүнээс үзвэл УУХҮ-ийн сайд нар өөрийнхөө хариуцлагагүй байдлаас үүдэлтэйгээр бий болсон шатахууны хомстлын бүх шалтгааныг өөрсдөөсөө зайлуулж, ОХУ-ын “Роснефть” компани болон БНХАУ руу чихэх гэж оролдсон нь тодорхой байна. Түүнчлэн Монгол Улсад нийлүүлэх шатахууны хэмжээгээ есдүгээр сард тодорхой шалтгааны улмаас бууруулна шүү гэж аль хоёр сарын өмнөөс анхааруулсаар байхад нь арга хэмжээ авахгүй байсаар байгаад улс орноо хүндхэн байдалд оруулсан мөртлөө ОХУ гэнэт л шатахуун нийлүүлэхээ зогсоосон мэтээр нь гөрдсөн нь маш бүдүүлэг үйлдэл мөн.

Шатахууны асуудалд менежмент хийж чадаагүй Г.Ёндон, Ц.Эрдэнэбаяр нар үүнийхээ төлөө хариуцлага хүлээж, огцрох ёстой.

2021 оны есдүгээр сарын 27

-ОХУ-аас 20 вагонд ачсан 1210 тонн АИ-92 шатахуун өчигдөр 17.00 цагт “Сүхбаатар” өртөөгөөр нэвтэрсэн. БНХАУ-ын талаас 50 вагон буюу 2500 тонн АИ-92 шатахуун өчигдөр Эрээн боомтод орж ирсэн. Шатахууны борлуулалтыг өнөөдрөөс /2021 оны есдүгээр сарын 27/ хэвийн горимд шилжүүлнэ. Эх сурвалж: “Өнөөдөр” сонин

УИХ-ын гишүүн асан, “Петровис” ХК-ийн гүйцэтгэх захирал О.Содбилэг:

-ОХУ-аас 1500 тонн шатахуун аравдугаар сарын 1 гэхэд ороод ирчих байх. Орж иртэл дөрөв, тав хонох байх. Үйлдвэрээсээ ачигдана, төмөр зам, хил гаалиар дамжаад компаниудын агуулах дээр бууж, тэндээсээ шатахуун түгээх станц руу очиж, хэрэглэгчид хүрэхдээ мэдээж тодорхой хугацаа орно. Ирэх сарын 15-наас ердийн байдалдаа шилжинэ гэж тооцоолж байна /Эх сурвалж: “Өдрийн сонин”/

FACTCHECK: Ердөө өчигдөрхөн л олон зуун метр үргэлжилсэн оочер дараалалд дарагдаад байсан ШТС-үүд өнөө өглөөнөөс эхлэн шатахуунаа хэвийн боловч, 30 мянган төгрөгийн хязгаарлалттайгаар худалдаалж эхэлсэн нь анхаарал татна.

Одоо нийслэлд байгаа шатахуун түгээх станцуудад ихдээ л 5-10 машин дугаарлаж байна.

Аравдугаар сарын 15-ны өдрөөс шатахууны борлуулалт хэвийн түвшинд очно хэмээн бүтэн нүүр дүүрэн ярилцлага өгсөн “Петровис” ХК-ийн гүйцэтгэх захирал О.Содбилэгийн яриа тэгэхээр худал болж таарлаа.

Мөн өнгөрсөн долоо хоногийн даваа гарагт АИ-92 шатахууны нөөцгүй болсон ШТС-ууд яг нэг долоо хоногийн дараа бүгдээрээ нэгэн зэрэг АИ-92 шатахууны нөөцтэй болж хэвийн ажиллаж эхэлсэн нь гайхаш төрүүлж байна.

ДҮГНЭЛТ:

Ямартай ч УУХҮ-ийн сайд Г.Ёндон болон АМГТГ-ын дэд дарга Ц.Эрдэнэбаяр нарын хариуцлагагүй үйлдлээс болж Монгол улс ойрын хэдэн жилд байгаагүй шатахууны хомстолд орж, нийтээрээ хохирлоо. Ийм байдалд оруулсан Г.Ёндон, Ц.Эрдэнбаяр нарт Ерөнхий сайд Л.Оюун-Эрдэнэ хариуцлага тооцох нөхцөл байдал бодитойгоор үүслээ. Мөн дээрх хүмүүс тав алхахгүй баригдахаа мэдсээр байж, өөрсдөөсөө асуудлыг холдуулах гэсэн башир арга хэрэглэж худал ярьсан нь өнөөдөр ил боллоо.

---