БНСУ-ын Ерөнхийлөгч Мүн Жэ Ин энэ долоо хоногийн эхээр НҮБ-ын Ерөнхий Ассамблейн чуулганд үг хэлэхдээ хоёр Солонгос болон АНУ-ыг 1950-1953 оны дайныг албан ёсоор дуусгавар болгож, Солонгосын хойг дахь эвлэрлийн төлөө том алхам хийхийг санал болгосон билээ. Тэгвэл БНАСАУ-ын зүгээс энэхүү саналыг "хэтэрхий эрт" хэмээн няцааж, АНУ-ын "дайсагнасан бодлого" өөрчлөгдөөгүй тохиолдолд дайныг дуусгах нь утгагүй явдал гэж мэдэгджээ.

Умард Солонгосын Гадаад хэргийн дэд сайд Ри Тэ Сон Ерөнхийлөгч Мүн Жэ Иний саналд албан ёсоор татгалзсан хариу өгсөн бөгөөд дайны төгсгөлийг тунхаглах нь "Хууль ёсны хувьд ямар ч нөлөөгүй бөгөөд нөхцөл байдал өөрчлөгдсөн тохиолдолд зүгээр л цаасны хаягдал болно" хэмээн тэмдэглэсэн байна.

Тэрээр "Дайн дуусгавар болсныг зарласнаар бусад хүчнүүд БНАСАУ-ын эсрэг дайсагнасан бодлогоо цуцлахад хүргэнэ гэсэн баталгаа байхгүй. Харин ч ийм мэдэгдэл нь бүс нутгийн стратегийн тэнцвэрт байдлыг алдагдуулж, хоёр Солонгосыг зэвсгийн хүчээрээ эцэс төгсгөлгүй тэмцэхэд хүргэх гамшигт үр дагавар авчрах болно" гэж мэдэгдэлдээ хэлжээ.

Солонгосын хойгт энх тайван, тогтвортой байдлыг бий болгохын тулд АНУ дайсагнасан бодлогоосоо буцах хэрэгтэй бөгөөд энэ нь холбогдох хүчнүүдийн "нэн тэргүүний зорилт" байх ёстой гэдгийг Ри Тэ Сон онцолсон байна.

Эх сурвалж: Yonhap News Agency

---