ОХУ-ын Холбооны аюулгүй байдлын албанаас Екатеринбург хотод үйл ажиллагаа явуулж байсан террорист бүлэглэлийн гишүүдийг саатуулжээ. Төв Азиас гаралтай сэжигтнүүд нь Ойрхи Дорнодын алан хядагчидтай холбоотой бөгөөд Оросын хөдөлмөрийн цагаачдыг террорист үйл ажиллагаанд нэгдэхийг ятгаж байсан гэж албаныхан мэдээлсэн байна.

Холбооны аюулгүй байдлын албаны мэдэгдэлд "Екатеринбург хотын алба хаагчид Төв Азиас гаралтай шашны хэт даврагч идэвхтнүүдийн үйл ажиллагааг таслан зогсоов. Тус бүлэглэлийн гишүүд олон улсын террорист байгууллагуудын үзэл суртлыг сурталчилж, цагаачдыг алан хядлагын чанартай гэмт хэрэг үйлдэхийг уриалан, ятгаж байсан нь тогтоогдсон" хэмээн тэмдэглэжээ.

Оросын Холбооны мөрдөх товчооны олон нийттэй харилцах төвөөс хэлснээр сэжигтнүүдийн байрлаж байсан газарт нэгжлэг хийхэд тэд Ойрхи Дорнод дахь террорист байгууллагуудын толгойлогчидтой холбоо тогтоож, цагаачдыг ОХУ-ын нутаг дэвсгэрт халдлага үйлдэхийг ятгаж байсан эд мөрийн баримтуудыг олсон аж.

Албаныхан одоо эрүүгийн хэрэг үүсгэн, шалгаж байгаа бөгөөд нэмэлт мөрдөн байцаах ажиллагааг гүйцэтгэж байгаа юм.

Эх сурвалж: TASS

---