ЭМЯ-наас "Ковид 19" цар тахлын нөхцөл байдлын мэдээг есдүгээр сарын 22-ны өдрийн байдлаар танилцууллаа.

Сүүлийн 24 цагийн хугацаанд 3416 тохиолдол бүртгэгдсэнээс 1896 нь Улаанбаатар хотод, 1518 нь орон нутагт бүртгэгдсэн байна. Мөн хоёр тохиолдол зөөвөрлөгдсөн байна. Хоногт 4767 хүн эдгэрчээ.

Өнгөрсөн 24 цагийн хугацаанд 21-ээс дээш насны 14 хүн нас барж, нийт нас баралтын тоо 1073 боллоо. Нас барсан иргэд бүгд архаг хууч өвчин нь "Ковид 19"-тэй хавсарсан учир нас баралтын шалтгаан болжээ. Нас барсан иргэдийн ар гэр, төрөл төрөгсдөд гүн эмгэнэл илэрхийлье. 

Орон нутгуудад халдварын тохиолдлын тоо буухгүй байна. Төв аймагт хамгийн их буюу 252 тохиолдол илэрсэн бол Булган аймагт 140, Дорноговь аймагт 116, Дундговь аймагт 169, Хэнтийд 128 тохиолдол бүртгэгдсэн байна. 

Эмнэлэгт 21 мянга гаруй хүн хэвтэн эмчлүүлж байгаа бөгөөд үүнээс  12 мянга гаруй нь хөнгөн, 6965 нь хүндэвтэр, 2027 хүнд, 376 хүн маш хүнд байна. Гэрийн хяналтад 62515 хүн өрхийн эмчийн хяналтад эмчилгээ үйлчилгээ авч байгаа аж.

Одоогийн байдлаар эмнэлэгт 4007 хүүхэд, 1310 жирэмсэн эх хэвтэн эмчлүүлж байна. Нийт хүн амын 65.3 хувь нь вакцины хоёрдугаар тундаа хамрагдсан гэж ЭМЯ-наас мэдээллээ.

---