Шведийн нэгэн хос дөнгөж төрсөн хүүдээ "Владимир Путин" хэмээх нэр өгөхийг хүссэн хэдий ч тус улсын холбогдох байгууллагаас уг нэрийг "зохисгүй" гэж үзэн, бүртгэхээс татгалзсан болохыг орон нутгийн "Aftonbladet" сонин мэдээлжээ.

Албаныхны гаргасан мэдэгдэлд "Нэр нь эзнээ гутааж, хүнд байдалд оруулан, ямар нэгэн шалтгаанаар зохисгүй гэж үзэгдэх ёсгүй" хэмээн тайлбарласан байна.

Шведийн өмнөд хэсэгт орших тосгоны оршин суугчид болох тус хос нь эхний хүсэлтээ энэ сарын эхээр илгээсэн хэдий ч татгалзсан хариу хүлээж авсан аж. Ингээд тэд хүүгээ зүгээр л "Путин" гэж нэрлэхийг санал болгосон хэдий ч энэ нь овог учраас нэр болгон ашиглахыг зөвшөөрөөгүй байна. Эрх баригчдын мэдээлж буйгаар албаныхны татгалзсан захидалд шинэ нэр бүртгүүлэх өргөдлийн маягтыг хавсаргасан байжээ.

Эх сурвалж: Deutsche Welle

---