Австрали улс АНУ, Их Британитай аюулгүй байдлын шинэ гэрээ байгуулахын тулд Францаас олон тэрбум ам.долларын шумбагч онгоц худалдаж авах гэрээгээ цуцалсан билээ.

Францын талаас "Аукус" гэрээ нь холбоотнуудын дунд "ноцтой хямрал" үүсгэсэн гэж үзэж байгаа юм. Энэхүү эсэргүүцлийн хүрээнд Францын эрх баригчид АНУ, Австралид суугаа Элчин сайдуудаа эгүүлэн татаж, урьд өмнө байгаагүй алхам хийжээ. Харин Ерөнхий сайд Скотт Моррисон Австралийг худал хэлсэн гэсэн шүүмжлэлийг няцааж, тус улсын зүгээс гэрээгээ цуцлах магадлалтай гэдгийг Франц улс мэдэж байсан хэмээн мэдэгдсэн байна.

“Аукус” гэрээний дагуу Австрали улс цөмийн хөдөлгүүртэй шумбагч онгоц бүтээх технологийг хүлээн авах бөгөөд энэ нь Өмнөд Хятадын тэнгис дэх БНХАУ-ын нөлөөг эсэргүүцэх зорилготой юм.

Гэвч уг түншлэлийн улмаас Франц болон Австралийн хоорондох 37 тэрбум ам.долларын гэрээ цуцлагдсан билээ. 2016 онд байгуулсан тус гэрээнд зааснаар Франц улс Австралид нийт 12 энгийн шумбагч хөлөг онгоц бүтээж өгөх байсан юм. Гэвч Франц улс "Аукус" гэрээний талаар олон нийтэд ил болохоос нь хэдхэн цагийн өмнө мэдсэн гэж мэдэгдсэн байна.

Ерөнхий сайд Скотт Моррисон өнгөрөгч ням гарагт хийсэн мэдэгдэлдээ Францын тал сэтгэл дундуур байгааг ойлгож байгаа хэдий ч тэрээр Австралийн байр суурийг үргэлж тодорхой илэрхийлсэн хэмээн онцолжээ.

Тэрээр "Бид энэ асуудлын талаар маш их санаа зовж, гүн гүнзгий эргэлзээтэй байсныг Францын Засгийн газар сайн мэдэж байсан. Эцсийн эцэст, энэ бол шинэ шумбагч онгоцнууд ашиглалтад ороод бидний хүсэж буй зүйлийг гүйцэтгэж чадах эсэх талаарх шийдвэр байсан. Учир нь эдгээрийг Австралийн татвар төлөгчид маш их зардал гарган бариулна. Ингээд бид боломжтой байсан хамгийн сайн тагнуул, батлан хамгаалах зөвлөмжид үндэслэн стратегийн дүгнэлт хийн, Францын шумбагч онгоцнууд бидний шаардлагыг биелүүлж чадахгүй гэж үзсэн" гэж ярьжээ.

Үүнээс өмнө Францын Гадаад хэргийн сайд Жан-Ив Ле Дриан "France 2" телевизэд өгсөн ярилцлагадаа Австрали улс "худал хэлж, хоёрдмол байдал гарган, итгэлцлийг үл тоомсорлосон" хэмээсэн юм. Тэрээр мөн "нөхцөл байдлыг дахин үнэлэхийн тулд" АНУ, Австралид суугаа Элчин сайдуудаа эгүүлэн татах болсноо мэдэгдсэн хэдий ч Их Британид суугаа Элчин сайдыг эгүүлэн татах "шаардлагагүй" хэмээн дурджээ.

АНУ-ын Ерөнхийлөгч Жо Байден ойрын өдрүүдэд Францын Ерөнхийлөгч Эммануэль Макронтой хэлэлцээр хийх төлөвтэй байгаа юм.

Эх сурвалж: BBC

Орчуулагч: Г.Энхсаруул

---