Алжир улсыг 1999-2019 оны хооронд удирдсан Ерөнхийлөгч асан Абделазиз Бутефлика 84 насандаа таалал төгссөн тухай орон нутгийн "ТВ1" телевиз мэдээлжээ.

Бутефлика нь 1999 онд тус улсын Ерөнхийлөгчөөр сонгогдохдоо нийт саналын 74 хувийг авч байсан бөгөөд үүнээс хойш дахин гурван удаа улиран сонгогдсон юм. Тэрээр 1990-ээд онд Алжирт өрнөж байсан иргэний мөргөлдөөний үе буюу "Хар арван жил"-д төгсгөл авчирсан гэж улс төрийн шинжээчид үздэг аж. Бутефликагийн удирдлага дор Алжирт 2005 онд бүх нийтийн санал асуулга явуулж, "Энх тайван, үндэсний эвлэрлийн дүрэм"-ийг баталсан нь тус улсын цуст мөргөлдөөнийг бодитоор зогсоосон байна.

Тэрээр төрийн эрх барьж байсан сүүлийн жилүүддээ эрүүл мэндийн ноцтой асуудалтай тулгарсан бөгөөд тэргэнцэртэй явах болсон билээ.

Гэсэн хэдий ч Бутефлика 2019 оны 2 дугаар сард удахгүй болох Ерөнхийлөгчийн сонгуульд нэр дэвшихээр шийдсэн гэдгээ зарласан ба энэ нь тус улсад урьд өмнө үзэгдээгүй эсэргүүцлийг өдөөсөн юм. Үүний улмаас тэрээр сонгуулиас нэрээ татсан хэдий ч ард иргэдийн эсэргүүцэл үргэлжилсээр байсан бөгөөд улмаар Алжир улс төрийн гүн хямралд орсон байна.

Ингээд Абделазиз Бутефлика 2019 оны 4 дүгээр сарын 2-нд Ерөнхийлөгчийн албан тушаалаасаа огцорчээ.

Эх сурвалж: TASS

---