Испанийн Канарын арлуудын Кумбре Виежа галт уул өнгөрөгч ням гарагт дэлбэрсэн бөгөөд орон нутгийн 5,000 орчим иргэнийг нүүлгэн шилжүүлэх шаардлагатай болжээ. Одоо галт уулын эргэн тойрон халуун хайлмаг, үнс, утаанд дарагдаад байгаа аж.

Кумбре Виежа галт уул нь 80 мянга орчим хүн амьдардаг Ла Палма арлын өмнөд хэсэгт оршдог бөгөөд хамгийн сүүлд 50 жилийн өмнө дэлбэрч байжээ. Орон нутгийн засаг захиргаанаас "Галт уулын дэлбэрэлт Эль Пасо мужийн Кабеза де Вака бүсэд эхэлсэн" гэж ням гарагийн 15:00 цагийн орчимд мэдээлсэн байна. Аюултай бүс гэж үзсэн хэдэн арван хэсэгт нүүлгэн шилжүүлэх ажлыг яаралтай зохион байгуулсан бөгөөд түр хоргодох байрыг нээсэн байна.

Гэхдээ Канарын бүс нутгийн тэргүүн Анхель Виктор Торресын хэлснээр галт уулсын дэлбэрэлтэд өртсөн бүс нь их хэмжээний ой модтой учир хүн ам цөөтэй аж. Тэрээр мөн одоогийн байдлаар хүний ​​амь эрсдээгүй гэдгийг тэмдэглэсэн байна. Харин халуун хайлмаг олон байшинд хүрч, хэд хэдэн замаар зорчих боломжгүй болгожээ.

Испанийн Ерөнхий сайд Педро Санчес өнгөрсөн ням гарагийн орой тус бүсэд очин, нөхцөл байдалтай танилцсан байна. Тэрээр НҮБ-ын Ерөнхий Ассамблейн чуулганд оролцохоор Нью Йорк руу нисэх ёстой байсан хэдий ч Ла Палма арал дээрх нөхцөл байдлын улмаас нислэгийн хуваариа хойшлуулсан гэж албаныхан мэдэгджээ.

Тус улсын Дотоод хэргийн яамнаас мэдээлснээр арлын оршин суугчдын аюулгүй байдлыг хангахын тулд хамгаалалтын албаны 200 алба хаагч дайчлагдсан бөгөөд нисдэг тэргүүдийг ямагт бэлэн байлгаж байгаа аж.

Эх сурвалж: AFP

---