Эрүүл мэндийн сайд С.Энхболд коронавирусийн эмчилгээ хийж буй зарим эмнэлэгт өнгөрөгч бямба гарагт ажиллажээ.

Энэ үеэрээ тэрээр "Эх нярайн Үндэсний төв-2" эмнэлгийн тусламж үйлчилгээний үйл явцтай танилцаж, зарим үүрэг чиглэлийг эмнэлгийн удирдлагад өгсөн байна. Иргэдийн хэлж заншсанаар Нисэхийн 300 орт эмнэлэг нь үйл ажиллагаагаа эхлүүлсэн цагаасаа "Ковид-19" өвчний эмчилгээг иргэдэд үзүүлж байгаа билээ.

Өнгөрсөн хугацаанд 20 гаруй мянган иргэнийг тус эмнэлэг эмчилсэн байна. Мөн гурван мянган жирэмсэн эмэгтэйд ковидын эмчилгээ хийж, цар тахлаар өвчилсөн 250 эхийг эсэн мэнд амаржуулжээ.

Өнөөдөр тус эмнэлэгт 1,100 хүн коронавирусийн эмчилгээ хийлгэж байгаа юм. Эдгээрээс 50 өвчтөн сэхээн амьдруулах тасагт хэвтэж буй бол жирэмсэн 350 орчим эмэгтэйд ковидын эмчилгээний тусламжийг үзүүлж байна.

Хүнд цагт хүчин чадлаасаа дөрөв дахин өвчтөн хүлээн авч, эмнэлгийн тусламж үзүүлж буй ЭХЭМҮТ-2 нийт хамт олонд Эрүүл мэндийн сайд С.Энхболд талархал илэрхийлж, дахин боломжоороо ороо нэмж ажиллах чиглэлийг эмнэлгийн удирдлагад өгчээ. Эмнэлгийн удирдлагын зүгээс жирэмсэн 500 эмэгтэйг авч, эмнэлгийн тусламж үзүүлэхээр төлөвлөлт хийснээ Эрүүл мэндийн сайдад танилцуулсан байна.

ЭНҮТ-2 эмнэлэг нь Ковидын эмчилгээ үйлчилгээний тусламжийг 1,100 хүнд үзүүлж буй хүчин чадлаа дахин боломжоороо нэмэхээр бэлтгэлээ хангаж байгаа аж.

---