Хүйтний улирал эхэлж, ахуйн гал түймрийн дуудлага Онцгой байдлын газарт бүртгэгдэх нь ихсэж байна.

Сүүлийн үед хашаа байшин, гарааш, машиндаа, гэртээ гал алдсан дуудлага зонхилох болжээ. Тухайлбал, 9 дүгээр сарын 16-ны өдөр Баянзүрх, Сүхбаатар дүүрэг болон Ховд аймагт айлын байшин болон амбаар, машин шатсан байна.

Мөн самар түүх, аялал зугаалгад гарах, хашааны шар өвсөө шатаах зэрэг олон шалтгаанаар гал түймэр гарч байгаа талаар нийслэлийн Онцгой байдлын газар болон нийслэлийн Байгаль орчны газраас мэдээлж байгаа юм.

Улсын хэмжээнд санамсаргүй гал түймрийн улмаас өнгөрсөн онд нийслэлд 126 удаагийн хээрийн түймэр гарч, 59.7 га талбай шатсан байна. Энэ онд улсын хэмжээнд ой хээрийн 25 дуудлага тохиолдол бүртгэгдсэн аж. Үүнээс ойн 1,765 га, хээрийн 120 мянган га талбай өртсөн байна.

Харин айл өрхүүд хавар, намар хашаандаа шар өвс шатаах, цахилгаан, зуухны аюулгүй байдал алдагдсны улмаас гал алдаж, эд хөрөнгө, эрүүл мэндээрээ хохирох шалтгаан болж байгаа юм. Иймд ил задгай тамхины иш, хог хаяхгүй байхыг анхааруулж байна.

---