ОХУ-ын эрх баригчид тус улсад дахин хөл хорио тогтоох бодолгүй байгаа бөгөөд энэ асуудлыг хэлэлцэх ч төлөвгүй байгаа гэдгийг Кремлийн хэвлэлийн төлөөлөгч Дмитрий Песков өнгөрөгч лхагва гарагт мэдэгджээ.

Оросын Засгийн газрын зүгээс коронавирусийн халдварын шинэ давлагаанд хэрхэн бэлтгэж байгаа ба иргэд, аж ахуйн нэгжүүдэд шинэ хязгаарлалт тавихаар төлөвлөж байгаа эсэх талаар түүнээс тодруулахад Песков "Хөл хориог огт бодолцож үзэхгүй байгаа. Одоогийн байдлаар хэлэлцэх асуудалд энэ сэдэв байхгүй" хэмээн хариулсан байна.

Тус улсын зарим эрүүл мэндийн мэргэжилтнүүд энэ 9 дүгээр сарын сүүлээр цар тахлын шинэ давлагаа дэгдэнэ гэж урьдчилан таамаглаж байгаа хэдий ч Дмитрий Песков энэ талаар эргэлзээтэй хандаж байгаа юм.

Тэрээр "Зарим вирус судлаачид шинэ давлагаа үүсэхийг үргэлж хүлээж байдаг. Гэтэл зарим нь ийм нөхцөл байдал үүсэх арай болоогүй гэж байхад шинэ давлагаа дахин хэзээ ч дэгдэхгүй гэж хэлэх мэргэжилтнүүд ч бий. Ер нь бол маш олон төрлийн үзэл бодол байгаа" хэмээн тэмдэглэжээ.

Эх сурвалж: TASS

---