Японы "Biomimetics Sympathies" компани коронавирусийн халдвараас урьдчилан сэргийлж, эмчлэх бодисын патент авчээ.

Энэхүү шинэ эмчилгээний бодис нь дархлааны систем, хариу урвалыг бэхжүүлэн, эсрэг биеийг үүсгэж, үүдэл эсийн эмчилгээ хийх чадвартай бөгөөд цар тахлын эсрэг эм болох өндөр үр дүнг харуулаад байгаа аж. Одоогоор уг эмийг судлан, боловсруулах явц үргэлжилж байгаа юм. Хэдийгээр энэ ажил үр дүн сайтай байгаа ч нэмж хөгжүүлэх зайлшгүй шаардлагатайг эрдэмтэд онцолсон байна.

Харин одоогийн байдлаар Япон улсад коронавирусийн хөнгөн болон хүндэвтэр өвчтөнүүдийг эмчлэхэд судсаар тарьдаг "Сотробимаб" эмийг хэрэглэж байгаа аж.

Цар тахлын эсрэг арга хэмжээг хариуцсан Эдийн засаг, санхүү, сэргээн босголтын сайд Ясутоши Нишимура энэ сарын 12-ны өдөр "NHK" агентлагт "Токио дахь эмнэлгийн байгууллагуудад коронавирустэй өвчтөнүүдэд эсрэг биеийн коктейлийн эмчилгээ хийж байгаа бөгөөд өвчтөнүүдийн 95 хувийнх нь биеийн байдал сайжирсан" хэмээн ярьжээ.

Тодруулбал, Токио хотын захиргаанаас нийт 116 эмнэлгийн байгууллагад эсрэг биеийн коктейлийн эмчилгээ хийлгэсэн 420 хүнээс судалгаа авсан аж. Халдварын эхэн үеэс эхлэн эмчилгээнд хамрагдах хүртэлх хугацааг авч үзэхэд хөнгөн өвчтөнүүдийн 56-аас дээш хувь нь дөрөв хоногийн дотор, хүндэвтэр өвчтөнүүдийн 63-аас дээш хувь нь тав хоногийн дараа сайжирсан байна.

Сонирхуулахад, тус улсад өнгөрөгч даваа гарагийн байдлаар 64 сая орчим хүн коронавирусийн эсрэг вакцины хоёр дахь тунгаа тариулаад байсан бөгөөд нийт хүн амын 63 хувь буюу 79 сая орчим хүн дор хаяж нэг тунгаа тариулаад байгаа аж. Мөн тус өдөр Японд 4,171 халдварын шинэ тохиолдол бүртгэгдсэн бөгөөд нийт батлагдсан тохиолдлын тоо 1,641,705-д хүрээд байгаа юм.

Эх сурвалж: NHK

---