Өмнөд Солонгосын нийт хүн амын 64.5 хувь нь коронавирусийн эсрэг вакцины нэгдүгээр тунд хамрагджээ. Энэ нь АНУ болон Япон улсыг давсан үзүүлэлт аж.

Тус улсын Засгийн газраас удахгүй болох Ургацын баярын амралтаас өмнө ард иргэдийнхээ 70 хувийг вакцины нэгдүгээр тунд хамруулах зорилт тавиад байсан бөгөөд үүнд хүрэхэд тун ойртоод байгаа юм. Энэ сарын 11-ний өдөр цар тахлын эсрэг дархлаажуулалтын нэгдүгээр тунд хамрагдсан хүний тоо 320 мянгаар өссөн бол вакцинжуулалтад бүрэн хамрагдсан хүний тоо 210 мянгаар нэмэгдсэн байна.

Ийнхүү БНСУ-ын нийт хүн амын 64.5 хувь буюу 33,130,333 хүн нэгдүгээр тунд хамрагдаад байгаа бол хоёрдугаар тунд 20,036,176 хүн буюу хүн амын 39.6 хувь нь хамрагдаад байгаа юм.

Харин АНУ вакцинжуулалтын хөтөлбөрөө өнгөрсөн оны 12 дугаар сарын 14-ний өдөр эхлүүлсэн хэдий ч одоогийн байдлаар нийт хүн амынх нь 62.15 хувь нь нэгдүгээр тунд хамрагдаад байгаа билээ. Үүнтэй харьцуулахад, Өмнөд Солонгосын дархлаажуулалтын хөтөлбөр үүнээс хоёр сарын дараа буюу энэ оны 2 дугаар сарын 26-ны өдөр эхэлжээ.

Гэвч тус улсын хүн амын ердөө 39 хувь нь вакцинд бүрэн хамрагдаад байгаа аж. АНУ-д энэхүү үзүүлэлт 52.90 хувьтай байгаа бол Японд 50.04 хувьтай байгаа юм. Өмнөд Солонгосын Засгийн газар энэхүү асуудлыг шийдэж, вакцинжуулалтад хамрагдах түвшнийг нэмэгдүүлэхээр хэд хэдэн арга хэмжээг авч байгаа билээ. Үүний хүрээнд, тус улсын иргэд дархлаажуулалтын цэг дээр илүү гарсан вакциныг цахимаар захиалан, тэр өдрөө тариулах боломжтой аж.

Эх сурвалж: https://www.seoul.co.kr/

Орчуулагч: Г.Энхсаруул

---