Францын Засгийн газар 25-аас доош насны бүх эмэгтэйчүүдэд жирэмснээс хамгаалах эмийг үнэ төлбөргүй санал болгох шийдвэр гаргасан болохоо өнгөрөгч пүрэв гарагт танилцуулжээ. Үүнээс өмнө зөвхөн 18-аас доош насны эмэгтэйчүүд жирэмснээс хамгаалах хэрэгслийг үнэгүй авах боломжтой байсан аж.

Тус улсын Эрүүл мэндийн сайд Оливье Веран хэлснээр "тодорхой тооны залуу эмэгтэйчүүдийн" жирэмснээс хамгаалах эмийн хэрэглээ буурсан болох нь судалгаагаар тогтоогдсон аж. Тэрээр энэ талаар "Тэдний эмээс татгалзах гол шалтгаан нь санхүүгийн асуудалтай холбоотой" хэмээн тайлбарлажээ.

Энэ алхам нь Францын Ерөнхийлөгч Эммануэль Макроны Засгийн газраас эрчимтэй хэрэгжүүлж буй эмэгтэйчүүдийн эрхийг нэмэгдүүлэх, залуучуудын ядуурлыг бууруулах олон арга хэмжээний нэг хэсэг юм.

Сонирхуулахад, Герман, Бельги, Нидерланд, Норвеги зэрэг Европын хэд хэдэн улс орнууд мөн өсвөр үеийнхэнд жирэмснээс хамгаалах эмийг үнэгүй олгодог аж. Харин Их Британи улсад тодорхой хэдэн жирэмснээс хамгаалах эмийг бүх эмэгтэйчүүдэд үнэ төлбөргүй олгодог байна.

Эх сурвалж: AFP

---