"Рок-н-роллын хаан" гэгддэг алдарт дуучин Элвис Преслигийн хэсэг үс нь дуудлага худалдаагаар 72,500 ам.долларын үнэд хүрэн, зарагджээ.

АНУ-ын Лос Анжелес хотын "Kruse GWS Auctions" дуудлага худалдааны газраас "Битүүмжилсэн саванд хийсэн Элвис Преслигийн үс нь холбогдох бичиг баримтын хамт 72,500 ам.доллароор зарагдсан. Энэхүү дуудлага худалдаагаар мөн түүний 1972 онд "Madison Square Garden" цэнгэлдэхэд өмссөн хослолыг 1,012,500 ам.доллароор зарсан" хэмээн мэдээлсэн байна.

Дуудлага худалдаагаар зарсан үсийг 20 гаруй жилийн турш Элвис Преслигийн хувийн үсчин байсан Хомер Гиллеланд дуучны үсийг олон удаа тайрах явцдаа цуглуулсан аж. Тэрээр үүнийгээ гялгар уутанд хийн хадгалж байсан бөгөөд дараа нь өөрийн болон Преслигийн дотны найз Томас Морганд бэлэглэсэн байна.

Элвис Преслигийн үстэй хамт ирэх баримт бичиг дунд Гиллеландын Преслигийн үсийг засахаар сууж явсан онгоцны тийз болон "үс цуглуулах чиглэлээр дэлхийн хамгийн итгэмжлэгдсэн мэргэжилтэн" болох "University Archives"-ын ажилтан Жон Резникоффын гарын үсэгтэй гэрчилгээ багтсан аж.

Эх сурвалж: UPI

---