УОК-ын дэргэдэх Эрдэмтдийн зөвлөлийн гишүүн О.Батбаяр дараах мэдээллийг өглөө.

Тэрбээр, Бид цаашид PCR шинжилгээгээр баталгаажсан ковид-19-ийн тоог албан ёсоор зарлах болно. 2021 оны 5-6 дугаар сард мутацлагдсан вирус орж ирсэн тул хурдавчилсан оношилгоонд суурилж, иргэдийг эмчилгээнд оруулж байсан. Тэгвэл өнөөгийн нөхцөл байдалд тулгуурлан энэ шийдвэрийг хүчингүй болгож байна. Орон нутагт хэрэглэж байгаа хурдавчилсан оношлуурыг татан авч, хяналт шалгалт явууллаа. Нийт 11 оношлуурын нэг нь л хэрэглэхийг зөвшөөрсөн оношлуур байна.

Есөн аймагт 11 төрлийн түргэвчилсэн оношлуур хэрэглэж байгааг мэргэжлийн хяналтын байгууллагаас шалгаж үзэхэд, 11 хувьд нь хуурамч эерэг хариу гарч байна.

Өдөрт 2000 тохиолдол гарсан байхад 220 хүний хариу хуурамч, эерэг гарч байна. Энэ нь 220 хүн халдвартай мөртлөө халдваргүй, халдваргүй мөртлөө халдвартай гэж буруу оношлогдож байна. Тэгэхээр өвчлөөгүй иргэдийг тусгаарлан, эмчилгээ хийж байна гэсэн үг. Тиймээс цаашид зөвхөн PCR шинжилгээгээр баталгаажсан тохиолдолд халдвар авсан гэж тооцно. Мөн шинж тэмдэг илэрсэн бол халдвар авсанд тооцно. Ингэснээр тархалтын тоо тодорхой хэмжээгээр буурах байх гэв.

Нэн шаардлагагүй бол иргэд шинжилгээ өгөхгүй байхыг зөвлөж байна. Өдөрт 500-700 сая төгрөгийг шаардлагагүй шинжилгээнд зарлагадаж байна.

Шинжилгээ шүтэхээс илүү амны хаалтаа зүүж, халдвар хамгааллын дэглэмээ сахих хэрэгтэй.

Бидний одоо баримталж байгаа гол зүйл гэвэл. Цар тахлын дельта давлагааны үед бол хүндрэл нас баралтаас сэргийлэх, эрсдэл бүлэг руу анхаарах ийм тактикийг баримталж байна.

---