АНУ-ын автомашин үйлдвэрлэгч Ford компани Энэтхэг улс дахь хоёр үйлдвэрээ хааж, тус улсад машин үйлдвэрлэх ажлаа бүрэн зогсоохоор болжээ. Тус компанийн зүгээс Гужарат болон Тамил Наду мужуудад үйл ажиллагаа явуулдаг үйлдвэрүүдээ 2022 оны хоёрдугаар улирал гэхэд бүрэн хаах ч машины хөдөлгүүрийн экспортоо үргэлжлүүлнэ гэжээ.

Ойрын жилүүдэд дэлхийн томоохон автомашин үйлдвэрлэгчид Энэтхэг дэх үйлдвэрүүдээ хаах шийдвэрийг гаргасаар байна. 2017 онд Женерал Моторс, өнгөрсөн жил Харли Дэвидсон тус улс дахь үйлдвэрлэлтээ зогсоосон юм. Энэтхэгийн Ерөнхий сайд Нарендра Моди гадны томоохон үйлдвэрлэгчдийг үлдээхээр хичээл зүтгэл гаргаж байгаа ч төдийлөн үр дүн авчрахгүй байна.

Ford-ын зүгээс өнгөрсөн 20 жилийн хугацаанд Энэтхэг дэх үйлдвэрлэл 2 тэрбум ам.долларын алдагдал хүлээсэн ба шинэ тээврийн хэрэгслийн хэрэгцээ шаардлага багассан гэжээ. Дэлхийд есдүгээрт эрэмбэлэгдэж байгаа Ford компани ирээдүйд цахилгаан жийп машин үйлдвэрлэхэд үйл ажиллагаагаа чиглүүлнэ гэсэн байна.

Эх сурвалж: ВВС

---