Японы нийслэл Токио хотод болсон зуны олимпын наадамд Умард Солонгос улс оролцох ёстой байсан ч багаа илгээгээгүй. Тиймээс Олон улсын Олимпын хорооны зүгээс Умард Солонгос улсын баг тамирчдад 2022 оныг дуустал хориг тавилаа.

Улмаар Умард Солонгосын баг тамирчид ирэх жилийн хоёрдугаар сард БНХАУ-ын нийслэл Бээжинд болох өвлийн олимпын наадамд оролцох эрхгүй болж байна. Өнгөрсөн жил болох ёстой байсан ч коронавируст цар тахлын улмаас жил хойшлогдож, энэ зун болсон Токиогийн олимпод баг, төлөөлөгчдөө илгээгүй шалтгаанаа Ковид-19 цар тахлаас сэрэмжилсэн үйлдэл хэмээн Пхеньян тайлбарлажээ.

Олон улсын Олимпын хорооны Ерөнхийлөгч Томас Бахын мэдэгдсэнээр хориг тавьсан хугацаанд БНАСАУ-ын Олимпын хороонд санхүүгийн тусламж, дэмжлэг үзүүлэхгүй гэжээ.

Эх сурвалж: ВВС

---