ОХУ-ын Ногинск хотын есөн давхар орон сууцад ахуйн хий дэлбэрсний улмаас таван хүн амиа алдаж, 17 хүн шархадсан гэж тус улсын Мөрдөн байцаах хорооноос мэдэгджээ.

Хорооны мэдэгдэлд "Дэлбэрэлтийн улмаас 17 орчим хүн гэмтэж бэртсэн бөгөөд хүнд гэмтсэн зургаан хүнийг эмнэлэгт хүргээд байна. Үлдсэн хохирогчдод газар дээр нь эмчилгээ хийсэн" гэж тэмдэглэсэн байна.

Харин амиа алдсан хүний ​​тоо одоогийн байдлаар тав болж нэмэгдээд байгааг Москва орчмын Онцгой байдлын яамны ерөнхий газраас мэдээлжээ. Яамны эх сурвалж "Тав дахь хохирогчийн цогцсыг нуранги дороос олсон. Энэ нь хүүхэд байсан бөгөөд одоо дахин хоёр хүний​г хайсаар байна" хэмээн "ТАСС" агентлагт ярьсан юм. 

Дэлбэрэлт орон сууцны гуравдугаар давхарт болсон бөгөөд барилгын гадна хананы хэсэг болон хоёроос тавдугаар давхрын тааз нурсан байна. Албаныхан осолтой холбоотой байгууллагуудыг аюулгүй ажиллагааны дүрмийг дагаж мөрдөөгүй үйлчилгээ үзүүлсэн гэх үндэслэлээр эрүүгийн хэрэг үүсгэн, шалгаж байгаа аж.

Эх сурвалж: TASS

---